Avropa İttifaqında (Aİ) yaşayan miqrantların sayı 2025-ci ildə rekord həddə çatıb.
Modern.az xəbər verir ki, bu barədə "Rockwool" Fondunun hesabatında qeyd olunur.
“Hesabatda bildirilir ki, Aİ-də xaricdə doğulmuş insanların sayı rekord səviyyəyə çataraq 2025-ci ildə təxminən 64 milyon nəfər olub.
Qeyd olunur ki, 2010-cu ildə miqrantların sayı 40 milyon idi, yəni 15 il ərzində bu göstərici 60% artıb. 2024–2025-ci illər arasında isə Aİ-də miqrantların sayı təxminən 2,1 milyon nəfər artıb.
Fondun məlumatına görə, Almaniya miqrantlar üçün əsas istiqamət olaraq qalır: onların sayı 2010-cu ildə təxminən 10 milyon nəfərdən 2025-ci ildə demək olar ki, 18 milyon nəfərə yüksəlib (təxminən +70%).
Fransa və İspaniya da sabit artım nümayiş etdirib və 2025-ci ilə qədər müvafiq olaraq təxminən 9,6 milyon (2010-cu ildən +30%) və 9,5 milyon (təxminən +50%) miqranta çatıb.
İtaliyada artım daha mülayim olub: 2010-cu ildə təxminən 4,6 milyon nəfərdən 2025-ci ildə təxminən 6,9 milyon nəfərə qədər.
Aİ-nin digər üzv ölkələrində isə eyni dövrdə ümumi artım təxminən 11,6 milyondan 20,4 milyon nəfərə (təxminən +75%) yüksəlib ki, bu da davamlı artım tendensiyasını göstərir.
Malta, Kipr və Lüksemburq kimi kiçik dövlətlərdə əhaliyə nisbətdə ən yüksək miqrant axını qeydə alınıb. Xüsusilə Lüksemburqda miqrantlar əhalinin təxminən 52%-ni təşkil edir. Onu Malta (32%) və Kipr (28%) izləyir. İrlandiya və Avstriyada da bu göstərici nisbətən yüksəkdir — təxminən 23%.
