Tərtərdə azyaşlının anası tərəfindən işgəncəyə məruz qalması Ailə, Qadın və Uşaq Probleləri üzrə Dövlət Komitəsi tərəfindən nəzarətə götürülüb.
Bu barədə Ailə, Qadın və Uşaq Problemləri üzrə Dövlət Komitəsindən Modern.az-ın sorğusuna cavab olaraq bildirilib.
Qeyd edilib ki, hazırda məsələ rəhbərliyin nəzarətindədir:
“Tərtər rayonunun Azad Qaraqoyunlu kəndində azyaşlının anası tərəfindən işgəncəyə məruz qalması ilə bağlı daxil olan məlumatlar tərəfimizdən araşdırılır. Nəticələri barədə ictimaiyyətə məlumat veriləcək”.
Tərtər rayonunun Azad Qaraqoyunlu kənd sakini Könül Dünyamalıyevanın azyaşlı oğlunu işgəncəyə məruz qoyması ilə bağlı məlumatlar yayılıb. Ananın şişi qızdıraraq uşağın bədəninin müxtəlif nahiyələrinə basdığı bildirilir. K.Dünyamalıyeva bu məlumatların əsassız olduğunu, boşanmaq üzrə olduğu həyat yoldaşının bunu aliment ödəməməsi üçün etdiyini deyib.
Bir neçə xəbər saytlarında Tərtər rayonu Azadqaraqoyunlu kənd sakini Dünyamalıyeva Könül Bəhlul qızı tərəfindən oğlu 2011-ci il təvəllüdlü T.Dünyamalızadənin nadinclik etdiyi üçün cəzalandırdırğı və hadisədən xəbər tutan uşağın atası Rafiq Dünyamalıyevin şikayətindən sonra Tərtər Rayon Prokurorluğunda Cinayət Məcəlləsinin 133.2.4-cü (yetkinlik yaşına çatmayan şəxsə qarşı işgəncə vermə) maddəsilə cinayət işi başlanıldığı haqqında məlumat yayılıb.
Bu hadisə ilə əlaqədar olaraq, Ailə,Qadın və Uşaq Problemləri üzrə Dövlət Komitəsi Tərtər Rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyası ilə əlaqə saxlayıb. Eyni zamanda, Dövlət Komitəsinin Ağdam Uşaq və Ailələrə Dəstək Mərkəzinin sosial psixoloqu, sosial işçisi, Tərtər RİH-nin nümayəndəsi, Qaraqoyunlu kənd ərazi nümayəndəsi ilə birgə ailəyə səfər edilib, hazırkı vəziyyət üzrə qiymətləndirmələr aparılıb. Məlumat üçün bildiririk ki, ailə münaqişəlidir, Dünyamalıyeva Könül (ana) və Dünyamalıyev Rafiq (ata) ayrı yaşayırlar.
Səfər zamanı məlum oldu ki Dünyamalıyeva Könül Laçın rayon sakini Dünyamalıyev Rafiq ilə ailəli olub. Ailə münaqişəsi zəmnində himayədarlar arasında yaranan problemlər nəticəsində qadın digər az yaşlı övladı ilə anasının himayəsinə sığınıb. Hər iki tərəf bir-birini qarşılıqlı ittiham edir. Eyni zamanda, nümayəndə heyəti Rafiq Dünyamalıyevin evində səfərdə olub. Hazırda övladının bədənində heç bir işgəncə yeri yoxdur. Uşaq köhnədən olan ləkə izlərinin anası tərəfindən edildiyini söyləyir.
Hal-hazırda müvafiq qurumlar tərəfindən faktla bağlı cinayət işi başlanılıb və araşdırma davam edir. Azərbaycan Respublikası Ailə,Qadın və Uşaq Problemləri üzrə Dövlət Komitəsi bu hadisəni nəzarətdə saxlayır və adiyyatı üzrə işlər aparılır.
