Rusiya müsəlmanları Moskvada prezidenti Vladimir Putinin adına məscid tikilməsi təşəbbüsü ilə çıxış ediblər. Məlumatda qeyd edilir ki, Birləşmiş İslam Konqresi Putinin adına məscid tikmək xahişi ilə artıq Moskva meri Sergey Sobyaninə müraciət də göndərib. Maraqlıdır, müsəlman olmayan şəxsin adına məscidin tikilməsi doğrudurmu?
İlahiyyatçı, “Məşədi Dadaş” məscidinin axundu Hacı Şahin Həsənli Modern.az-a deyib ki, bu mümkün deyil: “İndiyə qədər hansısa xristianın adını daşıyan məscid tikilməsi faktı olmayıb. Ümumiyyətlə, qeyri-müsəlman olanın adına məscid tikmək, hansısa məscidə onun adının verilməsi təcrübəsi yoxdur. Belə bir addımın atılmasını həm də doğru hesab etmirəm. Çünki məscid müsəlmanların ibadət yeridir. Ona görə də müsəlman şəxslərin adı ilə bağlı olmalıdır. Çox vaxt məscidlər müqəddəs şəxslərin, onları müşayiət edən insanların adı ilə bağlı olur. Məsələn, Əjdər məscidi, Məşədi Dadaş məscidi və sairə”.
Putinin adına məscid tikilməsinə gəlincə, axund bunun məqbul olmadığını deyib: “Əgər hər hansı qeyri-müsəlman olan insan siyasi xadimdirsə, məscidlə, ibadətlə bağlılığı yoxdursa, onun adına hansısa məscidin verilməsi məqbul deyil. Putinin də məscidlə heç bir bağlılığı yoxdur”.
Namidə BİNGÖL
