Ռուսական ռազմանավերը վերադարձել են Սիրիայի Տարտուս նավահանգստի բազա՝ չնայած օբյեկտը Սիրիայի իշխանություններին հանձնելու մասին համաձայնագրին։
Modern.az-ը հայտնում է, որ այս մասին տեղեկություն է տարածել «Le Figaro»-ն։
Ըստ թերթի՝ սեպտեմբերի սկզբին նավահանգստում նկատվել են ռուսական «Ադմիրալ Լևչենկո» կործանիչը, «Սպարտա» նյութատեխնիկական ապահովման նավը և «Ակադեմիկ Պաշին» մատակարարման նավը։ «Գեներալ Սկոբելև» տանկերը նույնպես եղել է այդ նավատորմի խմբի կազմում։
Ըստ տեղեկությունների՝ նավերը օգոստոսի վերջին շարժվել են հարավ՝ Իսպանիայի ափերի երկայնքով։ Թեև նրանց պաշտոնական նշանակման վայրը Եգիպտոսն էր, սակայն Ջիբրալթարի նեղուցն անցնելուց հետո նավերն անջատել են իրենց տրանսպոնդերները։
Ավելի ուշ արբանյակային պատկերները հաստատել են, որ նավատորմը կանգ է առել Տարտուսի նավահանգստում և անհայտ բեռ է բեռնաթափվել։
«Le Figaro»-ն գրում է, որ Բաշար Ասադի ռեժիմի տապալումից հետո Սիրիայում Ռուսաստանի ռազմական ներկայությունը զգալիորեն նվազել է. «Չնայած դրան, Մոսկվան, ըստ երևույթին, պահպանում է իր դիրքերը երկրում»։
Թերթի կարծիքով՝ Սիրիայի նոր ղեկավարությանը անհրաժեշտ են եղել որոշ ռեսուրսներ, որոնք կարող էր տրամադրել միայն Ռուսաստանը։ Այսպիսով, Սիրիայի զենքի պաշարների մեծ մասը ռուսական արտադրության է, և Դամասկոսի համար անհրաժեշտություն է առաջացել համալրել այդ պահեստները։
