Ermənistandan gül idxalına qoyulan qadağa Rusiyada qərənfil və qızılgülləri bahalaşdıracaq.
Modern.az yerli KİV-ə istinadən xəbər verir ki, konyak və mineral sudan sonra Rusiya tənzimləyicilərinin insanlar üçün təhlükəli hesab etdiyi Ermənistan güllərinin idxalına mayın 22-dən etibarən məhdudiyyət qoyulub. Bazar iştirakçıları xəbərdarlıq edirlər ki, bu qərar qiymətlərin artmasına səbəb olacaq. Onların sözlərinə görə, bəzi gül növləri artıq bahalaşmağa başlayıb.
"Rossexolznadzor" qadağanı onunla əsaslandırır ki, ermənistanlı həmkarlarının zəmanətlərinə baxmayaraq, gətirilən gül partiyalarında "karantin obyektləri" aşkar edilməkdə davam edir. Qurum həmçinin ehtimal edir ki, bu güllər heç də Ermənistan mənşəli olmaya bilər və idxalı qadağan edilmiş digər ölkələrdən gətirilə bilər. Ekspertlərin fikrincə, bu ifadə birbaşa Niderlandı hədəf alır. Belə ki, "Rossexolznadzor" hələ 2025-ci ilin ortalarında Niderlanddan toxum və şitillərin ("əkin materiallarının") idxalını qismən qadağan etmişdi.
Rusiyanın iri topdansatış şirkətlərinin birinin meneceri bildirib ki, vaxtilə Ermənistan vasitəsilə Niderlanddan Rusiyaya şitillər, dibçək gülləri və digər əkin materialları gətirilsə də, bu, çox məhdud miqyasda olub. Lakin o əlavə edib ki, Ermənistan özü Rusiyaya böyük həcmdə gül tədarük edən ölkədir, buna görə də tədarükün məhdudlaşdırılması bazarda ciddi hiss olunacaq. "Flowwow" gül və hədiyyə platformasının qiymətləndirməsinə görə, Ermənistan Rusiya gül bazarının natural ifadədə təxminən 5%-ni, pul ifadəsində isə 7%-ni təşkil edirdi.
Topdansatış şirkətinin əməkdaşı qeyd edib ki, Ermənistandan gələn tədarükün məhdudlaşdırılması xüsusilə qızılgül, qərənfil və lalələrin qiymətində kəskin sıçrayışa səbəb olacaq. Digər bir topdan satış sahibkarı isə qadağa elan edildikdən cəmi bir neçə saat sonra həmin güllərin qiymətinin artıq 5-7% yüksəldiyini vurğulayıb. Sahibkar hazırda ciddi narahatlıq keçirdiyini gizlətməyib:
"Səhərdən bəri sərhəddə Ermənistandan sifariş etdiyim bütöv bir yük maşını gül dayanıb. Əsas məsələ odur ki, gecə yarısına qədər sərhədi keçə bilsinlər. Əgər keçə bilməsələr, bütün partiyanı itirməli və silməli olacağıq".
