Ermənistan işğal zamanı bir çox qeyri-qanuni fəaliyyətlərlə məşğul olub. 

Modern.az xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev diplomatik korpusun nümayəndələri ilə görüşündə bildirib.

“Bildiyiniz kimi, gündəliyi pozmaq üçün bir çox məsələlər yaradılır. O cümlədən bəzi məsələlər təbliğat elementi kimi istifadə olunur. Ermənistan işğal zamanı bir çox qeyri-qanuni fəaliyyətlərlə məşğul olub. Azərbaycanın ictimai və mülki obyektləri, o cümlədən mədəni abidələri dağıntılara məruz qalıb. İşğaldan azad olunmuş ərazilərə ən son səfərimiz zamanı bunların şahidi olduq”, - Prezidentin köməkçisi deyib.

Bundan əlavə, Hikmət Hacıyev Azərbaycan ekoloqlarının və ekoloji qeyri-hökumət təşkilatlarının nümayəndələrinin Qarabağ iqtisadi rayonunda ekoloji terrora son qoyulması tələbi ilə etiraz aksiyası keçirdikləri Şuşa-Xankəndi yolundakı mövcud vəziyyət barədə diplomatik nümayəndəliklərin rəhbərlərinə məlumat verib.

Diqqətə çatdırılıb ki, Azərbaycan tərəfi "Qızılbulaq" mis-qızıl mədənində təbii sərvətlərin qanunsuz istismarı və talanması hallarının artması, bunun ekoloji fəsadlarının müşahidə olunması barədə məlumat əldə edib.