Xeyli vaxtdır ölkə xaricində olan Müasir Müsavat Partiyasının sədri Hafiz Hacıyev parlament seçkiləri ilə bağlı iddialarla çıxış edib.
Seçkilərə hazırlıq mərhələsindən danışan H. Hacıyev Modern.az-a ölkədən kənarda olduğu müddətdə partiyanın Gədəbəy rayon təşkilat sədrinin aldadıldığını söyləyib. O, İqbal Ağazadənin sədri olduğu Ümid Partiyasının Müasir Müsavat üzvünü ələ alaraq, öz tərəfinə çəkdiyini qeyd edib:
““Ümid” Partiyası Müasir Müsavatın təşkilat sədrinə guya hökumətlə razılaşdığını deyib. Partiyanın üzvləri bildiriblər ki, guya, hökumət “Ümid”ə 20 yer verib. Onlar elə bilirlər ki, mandat alma-armuddur, kimə gəldi paylayırlar. Halbuki, seçkidə xalqın iradəsi qalib gəlir”.
Məsələni işıqlandıran Modern.az qarşı tərəfin də mövqeyini öyrənməyə çalışıb. “Ümid” Partiyası sədrinin müavini Tamilla Qulami iddiaların heç bir əsası olmadığını söyləyib:
“Hafiz Hacıyev öz partiyasından xəbəri olmayan adamdır. Fəqani bəy Müasir Müsavatın deyil, Ümid Partiyasının Gədəbəy rayon təşkilatındadır. O iki dəfə parlament seçkilərində iştirak edib və Ümid Partiyasından namizədliyini irəli sürüb. Bir dəfə də bələdiyyə seçkilərində partiyamız adından çıxış edən Fəqani bəy 2005-ci ildən bizim sıralarımızdadır. O, 15 ildir ki, İqbal Ağazadənin yanındadır”.
T.Qulami Hafiz Hacıyevin hansı məqsədlə belə iddialar səsləndirdiyini anlamadığını söyləyib:
“Fəqani bəy hazırda da namizədliyini Ümid Partiyasından irəli sürüb. Biz rayon təşkilatlarımızla mütəmadi əlaqədə oluruq, tez-tez görüşürük. Hafiz Hacıyevin Fəqani bəy haqqında iddiaları cəfəgiyyatdır. Fəqani bəyin iki partiyanı eyni anda idarə edə biləcəyi ehtimalı da yoxdur”.
