Mayın 19-da futbol üzrə Azərbaycan Premyer Liqasının 2020-2021-ci il mövsümünün çempionu bəlli olub.
Modern.az xəbər verir ki, XXVIII turun sonuncu matçında çempion komandanın adına aydınlıq gəlib.
Son turadək 57 xalla lider olan "Qarabağ" ondan bir xal az toplayan "Neftçi"nin qonağı olub. "Dalğa Arena"dakı matç 1:0 hesabı ilə “Neftçi” klubunun qələbəsi ilə başa çatıb. Oyunda yeganə qolun müəllifi 90-cı dəqiqədə Əhməd Əhmədov olub.
Bununla da xalını 59-a çatdıran "Neftçi" "Qarabağ"ın ardıcıl 7 mövsümlük çempionluğuna son qoyub və qızıl medallara yiyələnib. Bu, flaqmanın 9-cu çempionluğu olub.
"Neftçi" UEFA Çempionlar Liqasında iştirakı təmin edib. "Qarabağ" isə 2021-2022-ci il mövsümündə UEFA Konfrans Liqasına qatılacaq.
"Ağ-qaralar"a qızıl medalları isə baş məşqçi karyerasında ilk dəfə Samir Abasov qazandırıb.
Qeyd edək ki, "Neftçi" və "Qarabağ" arasındakı matçdan sonra meydanda insident yaşanıb.
Qonaq komanda uzatma dəqiqələrində baş hakim Elçin Məsiyevin penalti təyin etməməsinə etiraz edib. Məsiyev Elvin Cəfərquliyevə qırmızı vərəqə göstərib.
