NATO-nun baş katibi Yens Stoltenberq Türkiyə prezidenti Rəcəb Tayyib Ərdoğanla Finlandiya və İsveçin alyansa üzvlük müraciətlərini müzakirə etdiyini bildirib.
Modern.az xarici KİV-ə istinadən xəbər verir ki, Yens Stoltenberqin sözlərinə görə, Ərdoğanla danışıqlar gələn həftə davam etdiriləcək.
"Hörmətli üzvümüz Türkiyənin prezidenti Rəcəb Tayyib Ərdoğanla Finlandiya və İsveçin NATO-ya müraciətlərini müzakirə etmək üçün telefonla danışdıq. Gələn həftə Brüssel və Madriddə danışıqları davam etdirməyə razılaşdıq", - Stoltenberq deyib.
Qeyd edək ki, mayın 18-də Finlandiya və İsveç Rusiyanın Ukraynadakı xüsusi hərbi əməliyyatı fonunda alyansa qoşulmaq üçün NATO-nun baş katibinə ərizə təqdim ediblər. Türkiyə bu müraciətlərə baxılması prosesinin başlamasını əngəlləyib.
Türkiyə prezidenti Rəcəb Tayyib Ərdoğan bildirib ki, Ankara Finlandiya və İsveçin NATO-ya üzvlüyünə “hə” deyə bilməz, çünki onların Türkiyədə qadağan olunmuş Kürdüstan Fəhlə Partiyasının (PKK) nümayəndələri ilə münasibətlərə dair verdiyi vədlərə inana bilmir.
