Ötən gün baş vermiş zəlzələ ilə əlaqədar Azərbaycanın Türkiyədəki səfirliyində Operativ Qərargah yaradılıb. 24 saat ərzində fasiləsiz fəaliyyət göstərən qərargaha dayanmadan zənglər gəlir.
Bunu Modern.az-a açıqlamasında Azərbaycanın Türkiyədəki səfirliyinin mətbuat katibi Aygün Qocayeva bildirib.
“Operativ Qərargaha edilən zənglər dayanmır. Zəlzələnin baş verdiyi hər bölgə üçün səfirliyin 1 əməkdaşı ayrılıb və bütün müraciətlər sistemləşdirilir. Səfirlik daxil olmuş və əldə edilmiş bütün məlumatları araşdırır”, - rəsmi açıqlamada vurğulanıb.
Qeyd edək ki, Türkiyənin Kahramanmaraş və ətraf vilayətlərində baş vermiş zəlzələ ilə bağlı Azərbaycanın Türkiyədəki səfirliyində, İstanbul və Qars şəhərlərindəki Baş Konsulluqlarında Operativ qərargahlar yaradılıb.
