Çin Ayda iki yeni mineral kəşf edib.
Modern.az “Global Times” qəzetinə istinadla xəbər verir ki, mineralların kəşfi Siçuan əyalətinin Çenqu şəhərində keçirilən 11-ci Çin Kosmos Gününün açılış mərasimində elan edilib.
“Çanqe-5” roveri tərəfindən toplanan qaya və torpaq nümunələrində tapılan fosfat minerallarına “maqneziochangisite-(Y)” və “changisit-(Ce)” adları verilib. Nadir torpaq fosfat kateqoriyasına aid olan bu minerallar Beynəlxalq Mineralogiya Birliyinin Yeni Minerallar, Terminlər və Təsnifat Komissiyası tərəfindən təsnif və təsdiq edilib.
Bu iki mineral Çinin Aydan toplanan qaya və torpaq nümunələrində kəşf etdiyi ikinci və üçüncü minerallardır. Çinli alimlər qrupu əvvəllər 2022-ci ilin sentyabr ayında Ay nümunələrində “changisit-(Y)” adlandırdıqları bir fosfat mineralının kəşf edildiyini bildirmişdi.
Bu yeni kəşflərlə bu günə qədər Ayda tapılan mineralların sayı səkkizə çatıb. Çindən əvvəl ABŞ və Rusiya Yerin təbii peykinin səthindən qaya və torpaq nümunələri toplayaraq mineral kəşfiyyatında öncülük etmişdi.
Çin ilk Ay roveri olan “Çanqe-5”i 2020-ci ilin noyabr ayında kosmosa buraxıb və kosmik aparat 2020-ci ilin dekabr ayında 1,73 kiloqram qaya və torpaq nümunələri ilə Yerə qayıdıb.
