BMT-nin İnsan Hüquqları üzrə İdarəsinin məlumatına görə, ABŞ və İsraillə müharibə başlayandan bəri İranda ən azı 21 nəfər edam edilib.
Modern.az xəbər verir ki, bu barədə CNN BMT-nin İnsan Hüquqları üzrə Ali Komissarı Volker Türkə istinadən bildirib.
Komissarın sözlərinə görə, edamlar İranın fərqli düşüncəni boğması fonunda həyata keçirilib, xüsusilə də “milli təhlükəsizliklə bağlı ittihamlar” əsasında.
O bildirib ki, ən azı 9 nəfər 2026-cı ilin yanvar ayında baş verən etirazlarla əlaqədar, 10 nəfər müxalif qruplara üzv olmaqda şübhəli bilindiyi üçün, 2 nəfər isə casusluq ittihamı ilə edam edilib.
Hesabatda qeyd olunur ki, fevralın 28-də İrana qarşı ABŞ-İsrail hərbi əməliyyatları başlayandan bəri “İranda milli təhlükəsizliklə bağlı ittihamlarla 4000-dən çox insan həbs edilib”.
Məlumata görə, onların bir çoxu “zorla oğurlanıb, işgəncələrə məruz qalıb və ya qəddar, qeyri-insani və ləyaqəti alçaldan rəftara məruz qalıb”.
“Artıq ciddi nəticələr doğuran münaqişəyə baxmayaraq, hakimiyyətin İran xalqını qəddar və qeyri-insani üsullarla hüquqlarından məhrum etməyə davam etməsi məni dəhşətə gətirir”, — deyə Türk bildirib.
