ABŞ Prezidenti Donald Trampın ən yaxın köməkçilərindən biri olan Natali Harpın təxminən bir il ərzində məxfi məlumatlara çıxış üçün zəruri icazə olmadan Ağ Evdə çalışdığı barədə məlumatlar təhlükəsizlik məsələləri ilə bağlı yeni suallar yaradıb.
Modern.az xəbər verir ki, "MS NOW" iki mənbəyə istinadən bu barədə məlumat yayıb.
Məlumata görə, ABŞ prezidentinin icraçı köməkçisi vəzifəsini tutan Harp bir il ərzində məxfi məlumatlara çıxış üçün standart icazə prosedurundan keçməyib. Onun naməlum səbəbdən bunun üçün tələb olunan sənədləri doldurmaqdan imtina etdiyi bildirilir.
Vəziyyət yalnız Ağ Evin Hüquq İdarəsinin əməkdaşlarının məsələni diqqətə çatdırmasından və Trampın özünün müdaxiləsindən sonra dəyişib. Bundan sonra Harp federal yoxlamanın aparılması üçün tələb olunan sənədləri doldurub və nəticədə məxfi məlumatlara çıxış icazəsi əldə edib.
Ağ Evin keçmiş etika üzrə mütəxəssisi Norm Ayzen baş verənləri “şokedici” adlandırıb.
“Potensial olaraq dövlətin ən həssas sirlərinə çıxışı ola biləcək bir köməkçinin bu qədər uzun müddət məxfi məlumatlara çıxış icazəsi olmadan işləməsi heyrətamizdir”, - deyə o bildirib.
Ayzenin sözlərinə görə, bu vəziyyət Tramp administrasiyasının müəyyən edilmiş prosedurlara məhəl qoymamağa və prezidentin xüsusi etimad göstərdiyi şəxslərə görə milli təhlükəsizlik baxımından risklər yaratmağa hazır olduğunu nümayiş etdirir.
Ağ Ev isə bu ittihamları rədd edib. Prezidentin mətbuat katibi Karolin Livitt bildirib ki, “Natali Harp da digərləri kimi məxfi məlumatlara çıxış icazəsinə malikdir”. O, Harpı prezident komandasının sadiq və zəhmətkeş üzvü kimi xarakterizə edib.
Bununla belə, Harpın icazəsinin rəsmiləşdirilməsində gecikmə olması ilə bağlı məlumatlar keçmiş respublikaçı məmurlar arasında da narahatlıq yaradıb.
ABŞ-ın keçmiş prezidenti Corc Buşun administrasiyasında etika məsələləri üzrə baş hüquq müşaviri vəzifəsində çalışmış Riçard Peynter qeyd edib ki, Ağ Ev əməkdaşları adətən bioqrafik yoxlamadan keçirlər. Lakin onun sözlərinə görə, əlavə məxfi məlumatlara çıxış icazəsi hər bir əməkdaş üçün tələb olunmur və bunun zəruriliyi məxfi məlumatlara çıxışın xarakterindən asılıdır.
Peynter bildirib ki, Harp səfərləri zamanı prezidentə müşayiət edirsə, vəziyyət daha ciddi xarakter ala bilər.
Onun sözlərinə görə, köməkçi Trampın yaxınlığında, məsələn, “Air Force One” prezident təyyarəsində olarkən məxfi məlumatların müzakirə edildiyi söhbətləri təsadüfən eşidə bilər. Bu halda müvafiq icazənin olmaması potensial milli təhlükəsizlik probleminə çevrilə bilər.
35 yaşlı Natali Harp xərçəng xəstəliyindən sağ çıxması və Trampın fəal tərəfdarı kimi tanınır. ABŞ mediası onu prezidentin ən sadiq köməkçilərindən biri kimi təqdim edir.
Harp, həmçinin Trampın sosial şəbəkələrdəki paylaşımlarına kömək edir və mütəmadi olaraq onun haqqında müsbət materialların çap olunmuş nüsxələrini prezidentə təqdim edir. Buna görə ona “insan printeri” ləqəbi verilib.
Harpın Trampa sədaqəti bu il The New York Times jurnalistləri Meggi Haberman və Conatan Svanın müəllifi olduğu "Regime Change" kitabında da təsvir edilir. Müəlliflərin iddiasına görə, Harp Trampa heyranlığını ifadə edən məktublar yazıb. Onlardan birində onun Trampa “Mənim üçün əhəmiyyətli olan yeganə şey sənsən” dediyi bildirilir.
Bütün bunların fonunda Trampa ən yaxın Ağ Ev əməkdaşlarından birinin uzun müddət zəruri məxfi məlumatlara çıxış icazəsi olmadan işləyə bilməsi ilə bağlı suallar daha da həssas xarakter alıb.
