Bosniya serblərinin keçmiş lideri və Serb Respublikasının sabiq prezidenti Biljana Plavşiç 96 yaşında Belqradda vəfat edib.
Modern.az xəbər verir ki, bu barədə “Associated Press” məlumat yayıb.
1992–1995-ci illərdə Bosniya və Herseqovinada baş verən müharibə zamanı Plavşiç Bosniya serblərinin rəhbərliyində yer alıb. 2000-ci ildə keçmiş Yuqoslaviya üzrə Haaqa Beynəlxalq Tribunalı Bosniya ərazisində ayrıca serb qurumu yaratmaq kampaniyası ilə əlaqədar onu soyqırımı, hərbi cinayətlər və insanlıq əleyhinə cinayətlərdə ittiham edib.
Plavşiç 2001-ci ildə könüllü şəkildə tribunal qarşısına çıxıb. Daha sonra insanlıq əleyhinə cinayət kimi təqibdə təqsirini etiraf edib. Digər ittihamlar isə təqsiri etiraf etməsi ilə bağlı razılaşma çərçivəsində götürülüb.
Tribunal hökm çıxararkən bildirib ki, Plavşiç kütləvi etnik təmizləmələr barədə məlumatları görməzdən gəlib və baş verənləri açıq şəkildə müdafiə edib. Məhkəmə onu 11 il müddətinə azadlıqdan məhrum edib. Plavşiç 2009-cu ildə cəzasının təxminən üçdə ikisini çəkdikdən sonra azadlığa çıxıb.
Müharibə başa çatdıqdan sonra Plavşiç Serb Respublikasının prezidenti olub və Bosniyadakı müharibəyə son qoyan Deyton sazişinin həyata keçirilməsində iştirak edib. ABŞ-ın keçmiş dövlət katibi Madlen Olbrayt bildirib ki, Plavşiç sazişin əleyhdarlarının onun ləğvinə nail olmağa çalışdığı dövrdə sənədi fəal şəkildə dəstəkləyib.
Plavşiçin ölümündən sonra Bosniya serblərinin lideri Milorad Dodik başsağlığı verib. O, Plavşiçin yaxın silahdaşı olduğunu və dövlət səviyyəsində ehtiram göstərilməsinə layiq olduğunu bildirib.
