Emal olunmuş ət məhsullarının müntəzəm istehlakı və ətin düzgün bişirilməməsi sağlamlığa ciddi zərər vura bilər. Dietoloq Viktoriya Kostrova kolbasa, bekon və yanmış ət qabığının təhlükələri barədə xəbərdarlıq edib.
Modern.az xəbər verir ki, mütəxəssis kolbasa, sosiska, bekon, hazır paştetlər və hisə verilmiş ət məhsullarını potensial təhlükəli hesab edir. Bu məhsullar duzlama, konservləşdirmə və dad gücləndirilməsi kimi emal proseslərindən keçir.
Dietoloqun sözlərinə görə, Ümumdünya Səhiyyə Təşkilatı emal olunmuş əti müntəzəm istehlak zamanı sağlamlığa zərəri sübut edilmiş məhsullar kateqoriyasına daxil edir. Gündə cəmi 50 qram kolbasa yemək belə, yüksək duz, konservant və emal zamanı yaranan bəzi maddələr səbəbindən bağırsaq xərçəngi riskini artıra bilər.
Bundan başqa, qırmızı ətin qaralana qədər qızardılması da təhlükəlidir. Yüksək temperaturda yağların və zülalların parçalanması nəticəsində kanserogen maddələr əmələ gəlir.
Zərəri azaltmaq üçün dietoloq yanmış hissələri kəsməyi, əti isə əsasən pörtlətməyi, sobada bişirməyi, qaynatmağı və ya buxarda hazırlamağı tövsiyə edir.
Mal, dana və qoyun əti zülal, dəmir, sink və B12 vitamini ilə zəngin olsa da, miqdara diqqət yetirmək vacibdir. Mütəxəssis həftədə 350-500 qram qırmızı ət istehlak etməyi, qidalanmada onu quş əti, balıq və bitki mənşəli zülallarla növbələşdirməyi məsləhət görür.
