Belçika kralı Filip ölkənin Baş naziri Bart De Veverin istefa ərizəsi ilə bağlı qərarını təxirə salıb və ona dövlət büdcəsi ilə bağlı danışıqları davam etdirməyi tapşırıb.
Modern.az xəbər verir ki, bu barədə Kral Sarayının “X” sosial şəbəkəsində yaydığı bəyanatda bildirilib.
“Kral qərar qəbul etməyi təxirə salıb. Sabahdan etibarən monarx hakim çoxluğa daxil olan partiyaların sədrləri ilə məsləhətləşmələr aparacaq”, – deyə bəyanatda qeyd olunub.
Xatırladaq ki, Bart De Vever 2027-ci ilin dövlət büdcəsi ilə bağlı hakim koalisiya daxilində aparılan danışıqların nəticəsiz qalmasından sonra krala istefa ərizəsi təqdim edib.
Bir qayda olaraq, monarx hökumət başçısının ilk istefa müraciətini qəbul etmir və ona danışıqlar üçün daha bir cəhd göstərməyi tapşırır. Siyasi böhran təhlükəsi yarandıqda partiyalar, əksəriyyətinin növbədənkənar seçkilərin keçirilməsini siyasi baxımdan daha sərfəli hesab etmədiyi təqdirdə, çox vaxt kompromisə gedirlər.
Hazırda Belçika hökumətinin illik büdcəsində 10 milyard avro çatışmazlıq var. Buna səbəb hərbi xərclərin artırılmasıdır. Həmin vəsaitin tapılması üçün ya sosial xərclər azaldılmalı, ya da vergilər və rüsumlar artırılmalıdır.
2025-ci ildə Belçikanın dövlət borcu 735 milyard avroya çatıb. Bu, ölkənin ümumi daxili məhsulunun (ÜDM) 110 faizi deməkdir.
Bu, görünməmiş dərəcədə yüksək göstəricidir. Bart De Vever dövlət borcunun daha da artmasının qarşısını almaq üçün maksimum səy göstərməyə çalışır. Baş nazir büdcə kəsirinin yeni borclanmalar hesabına qarşılanmasını istəmir.
