Avropa Komissiyası Azərbaycan qazını Avropaya daşıyacaq Cənub Qaz Dəhlizinin bir qolu olan Trans-Adriatik Boru Kəməri (TAP) sazişinin reallaşmasına razılıq verib. Modern.az saytının xarici mediaya istinadən verdiyi xəbərə görə, Avropa Komissiyasının bununla bağlı yazılı açıqlamasında bildirilir: “Avropa Komissiyası Yunanıstan rəhbərliyi ilə Trans-Adriatik boru xətti arasında aparılan müqavilənin, Avropa Birliyinin dövlət yardımı normalarına uyğun olduğunu müəyyən edib. Layihə daxili bazardakı rəqabət qaydalarını pozmadan Avropa İttifaqının enerji təhlükəsizliyini və şaxələndirilməsini yaxşılaşdırır”.
Müqaviləyə görə 5 il ərzində layihəyə 5,6 milyard avro yatırılacaq. Bunun 2,3 milyard dollarını Yunanıstan tərəfi ödəyəcək.
TAP müqaviləsi, 2013-cü il fevralın 13-də Yunanıstanın paytaxtı Afinada Yunanıstan, Albaniya və İtaliya tərəfindən imzalanıb. 2019-ci ildə istismara verilməsi planlaşdırılan boru kəmərinin başlanğıc gücü 10 milyard kubmetr, tutumunun daha sonra 20 milyard kubmetrə çıxarılması planlaşdırılır.
Modern.az
