Slovakiya Prezidenti Peter Pelleqrini bugün Şuşaya səfər edərək Prezident İlham Əliyevlə görüşüb. Peter Pelleqrini Qarabağın tarixi mərkəzinə səfər edən növbəti xarici dövlət başçısı olub.
Qarabağın tarixi paytaxtı Şuşa son illərdə Azərbaycanın mühüm beynəlxalq görüş məkanlarından birinə çevrilib. 2020-ci il Vətən müharibəsindən sonra bərpa və yenidənqurma işləri ilə yanaşı, şəhər yüksək səviyyəli diplomatik tədbirlərə də ev sahibliyi edib. Müxtəlif ölkələrin prezidentlərinin Şuşaya səfərləri Azərbaycanla həmin dövlətlər arasındakı əlaqələrin inkişafında mühüm hadisələrlə yadda qalıb.
Şuşaya ilk səfər edən xarici dövlət başçısı Türkiyə Prezidenti Rəcəb Tayyib Ərdoğan olub. 15 iyun 2021-ci ildə baş tutan tarixi səfər zamanı Ərdoğan Azərbaycan Prezidenti İlham Əliyevlə görüş keçirib. Görüşün ən mühüm nəticəsi Azərbaycan və Türkiyə arasında müttəfiqlik münasibətlərini rəsmiləşdirən Şuşa Bəyannaməsinin imzalanması olub. Liderlər həmçinin Şuşanın tarixi məkanlarını ziyarət edib, şəhərin gələcək inkişafı və bərpası ilə bağlı məsələlərə diqqət yetiriblər.
2023-cü ildə Şuşa daha bir xarici lideri qəbul edib. 23 avqust 2023-cü ildə Özbəkistan Prezidenti Şavkat Mirziyoyev şəhərə səfər edib. Azərbaycan Prezidenti İlham Əliyevlə birlikdə keçirilən görüşlərdə iki ölkə arasında dostluq və əməkdaşlıq münasibətləri müzakirə olunub. Səfər zamanı Şuşanın tarixi abidələri, aparılan bərpa işləri və mədəni irs nümunələri ilə tanışlıq olub.
2024-cü ilin martında isə Qazaxıstan Prezidenti Kasım-Jomart Tokayev Şuşaya gəlib. 12 mart tarixində baş tutan səfər Azərbaycan-Qazaxıstan strateji tərəfdaşlığının göstəricisi kimi qiymətləndirilib. Prezidentlər Şuşanın tarixi yerlərini ziyarət edib, şəhərdə həyata keçirilən layihələrlə tanış olublar. Səfər iki ölkə arasında siyasi, iqtisadi və mədəni əlaqələrin daha da gücləndirilməsi baxımından əhəmiyyətli olub.
Həmin ilin iyulunda Şuşa beynəlxalq səviyyəli daha böyük tədbirəev sahibliyi edib. 6 iyul 2024-cü ildə Türk Dövlətləri Təşkilatının qeyri-rəsmi Zirvə görüşü Şuşada keçirilib. Görüşdə Azərbaycan, Qazaxıstan, Özbəkistan, Qırğızıstan və digər türk dövlətlərinin nümayəndələri iştirak ediblər. Zirvə türk dünyasında əməkdaşlığın genişləndirilməsi və ortaq layihələrin müzakirəsi ilə yadda qalıb.
2025-ci ildə Şuşaya səfər edən növbəti dövlət başçısı Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan olub. 16 sentyabr 2025-ci ildə keçirilən səfər zamanı Azərbaycan Prezidenti İlham Əliyevlə görüşlər baş tutub. Liderlər Azərbaycan-BƏƏ münasibətlərinin inkişafı, iqtisadi əməkdaşlıq və regional məsələlər ətrafında fikir mübadiləsi aparıblar. Şuşada keçirilən görüş iki ölkə arasında əlaqələrin yeni mərhələyə keçdiyini nümayiş etdirib.
Beləliklə, 2021-ci ildən etibarən Şuşa Türkiyə, Özbəkistan, Qazaxıstan, Slovakiya və Birləşmiş Ərəb Əmirlikləri kimi ölkələrin liderlərini qəbul edən mühüm diplomatik məkana çevrilib. Şəhərdə keçirilən bu görüşlər Şuşanın yalnız Azərbaycanın mədəniyyət beşiyi deyil, həm də beynəlxalq siyasi dialoq üçün əhəmiyyətli ünvan olduğunu göstərir.
Nicat Rüstəmzadə
