Ukrayna prezidenti Pyotr Poroşenko rusiyalı həmkarı Vladimir Putinlə Minskdə görüşdən sonra da rəsmi Kiyevin Avropa Birliyinə inteqrasiyasını davam etdirmək niyyətindədir.
Modern.az saytının məlumatına görə bu bəyanatla Ukrayna Prezident Administrasiyası rəhbərinin müavini Valeriy Çalıy çıxış edib.
O bildirib ki, Ukrayna Avropa Birliyi ilə assosiasiya sazişini təxirə salmayacaq. “Müzakirələrin kifayət qədər gərgin olmasına baxmayaraq, Ukrayna prezidentinin mövqeyi dəyişməz və dəqiqdir. Ukrayna sentyabr ayında Avropa Birliyi ilə assosiasiya sazişini təsdiq edəcək”.
Qeyd edək ki, avqustun 26-da Minskdə Ukrayna prezidenti Pyotr Poroşenko Gömrük İttifaqına daxil olan ölkələrin prezidentləri ilə görüşü çərçivəsində Rusiya dövlət başçısı Vladimir Putinlə təkbətək görüşüb.
Modern.az
