“Hərəkatı istənilən şəxs yarada bilər. Problem yoxdur. Lakin bunun partiyaya aidiyyatı yoxdur”.
Bunu Modern.az saytına açıqlamasında Müsavat başqanının müavini Səxavət Soltanlı deyib. O, Müsavat Partiyasının üzvü Qubad İbadoğlunun yaratdığı “Azərbaycan Demokratiya və Rifah” hərəkatı ilə bağlı məsələyə münasibət bildirərkən qeyd edib ki, bu başqa bir partiyanın yaranması demək deyil.“Müsavat partiyasının üzvü heç bir başqa siyasi partiyanın üzvü ola bilməz. Bu sadəcə hərəkatdır. İctimai fəaliyyətlə məşğul olacaqlar. Yeni yaranan hərəkatın daxilində müsavatçı olmayan insanlar da var. Əslində bizə məlum deyil ki, onların fəaliyyəti nə ilə bağlı olacaq. Mənə qaranlıq qalan məqam isə bir həftə əvvəl iki nəfərin başqa bir təşkilat yaratmalarıdır. İndi bu hərəkatın yaradılması mənə qeyri-ciddi gəldi.
Qeyd edirəm ki, bu fraksiya deyil. Adil Qeybulla, Səxavət Əlisoy bundan qabaq da hərəkat yaradıblar. Partiya daxilində bir neçə hərəkat yaratmaq olar, bu problem deyil”.
Qeyd edək ki, Müsavat başqanlığına sabiq namizəd Qubad İbadoğlu yeni hərəkat yaratdığını və onun bəyannaməsini mətbuata açıqlayıb.
Məltəm Talıbzadə
