Bu ilin 11 ayı ərzində Fövqəladə Hallar Nazirliyinin (FHN) Dövlət Yanğından Mühafizə Xidmətinə yanğınla bağlı 10 567 çağırış daxil olub. Trend xəbər verir ki, bunu fövqəladə hallar naziri Kəmaləddin Heydərov Fövqəladə Hallar Nazirliyinin yaradılmasının 9-cu ildönümü və nazirlik işçilərinin peşə bayramı münasibətilə FHN-in Mərkəzi aparatında keçirilən kollegiya iclasında deyib.
K.Heydərov qeyd edib ki, bu hadisələrin 3667-si Bakı şəhərində qeydə alınıb. Ümumilikdə yanğın hadisələrinin 14-ü yüksək saylı çağırışla, digərləri isə çevik şəkildə söndürülüb.
Nazirin sözlərinə görə, hər gün orta hesabla 32 yanğın hadisəsi baş verib, hər 7 gün ərzində isə 1 nəfər yanğın hadisələri zamanı xilas edilib.
Bu ilin hesabat dövründə baş vermiş yanğınlar nəticəsində 39 nəfər həlak olub. Görülən tədbirlər nəticəsində 123 dövlət, 600 fərdi ev, 312 özəl obyekt, 305 müxtəlif təyinatlı texnika yanğından mühafizə edilib.
Yanğınsöndürənlər tərəfindən 11-i uşaq olmaqla 47 nəfər xilas edilib, 738 nəfər isə yanğının baş verdiyi ərazilərdən təxliyə olunub.
K.Heydərov deyib ki, Fövqəladə Hallar Nazirliyinin (FHN) Xüsusi Riskli Xilasetmə Xidmətinin xilasetmə qrupları 11 ay ərzində 675 müxtəlif axtarış və qəza-xilasetmə əməliyyatlarında iştirak ediblər.
Nazirin sözlərinə görə, Xüsusi Riskli Xilasetmə Xidmətinin xilasetmə qrupları bu ilin 11 ayı ərzində yol-nəqliyyat hadisəsi, çoxmənzilli yaşayış binasında partlayış, partlamamış silah-sursat aşkarlanması, texnogen mənşəli yanğın, həyat təminatlı kommunal sistemlərdə qəzalar, mənzildə qaz sızması, intihara cəhdin qarşısının alınması, mənzildə köməksiz vəziyyətdə qalma, liftdə qalma və s. xarakterli olmaqla 675 müxtəlif axtarış və qəza-xilasetmə əməliyyatlarında iştirak ediblər: "Fövqəladə halların və bədbəxt hadisələrin nəticələrinin aradan qaldırılması zamanı 257-si uşaq olmaqla 651 nəfər zərərçəkmiş xilas edilib, 68 nəfər zərərçəkmişə ilkin yardım və ya təxirəsalınmaz tibbi yardım göstərilib".
Partlayıcı maddələrin və hərbi sursatların aşkar olunduğu ərazilərdə vətəndaşların təhlükəsizliyinin təmin olunması üçün təxirəsalınmaz tədbirlər həyata keçirilib.
K.Heydərov qeyd edib ki, Dövlət Yanğından Mühafizə Xidmətinin xilasediciləri tərəfindən 85 dəfə nəqliyyat və digər qəzalara çıxışlar olub, 204 nəfər deformasiyaya uğramış nəqliyyat vasitələrindən çıxarılıb.
Hesabat dövründə Dövlət Sularda Xilasetmə Xidmətinin dalğıc-xilasediciləri tərəfindən nəzarət olunan çimərlik ərazilərində batmaq təhlükəsi ilə üzləşmiş 142 nəfər və nəzarət olunmayan qeyri-çimərlik ərazilərdə 119 nəfər olmaqla cəmi 261 nəfər xilas edilib. Nəzarət olunmayan çimərlik ərazilərində həlak olmuş 73 nəfərin cəsədi tapılaraq aidiyyəti üzrə təhvil verilib.
Görülən tədbirlər sayəsində son 4 il ərzində nəzarət olunan çimərlik ərazilərində suda batma halları baş verməyib.
Modern.az
