Avropa Birliyinin Cənubi Qafqaz üzrə səlahiyyətli nümayəndəsi Piter Semnebi Dağlıq Qarabağda qoşunların təmas xəttində son günlər vəziyyətin gərginləşməsindən narahatdır. Modern.az xarici mətbuata istinadən xəbər verir ki, Semnebi bu barədə “Röyter” agentliyinə verdiyi müsahibəsində bildirib. Onun sözlərinə görə, Qarabağda artan toqquşmalar nəzarətdən çıxa bilər. Semnebi açıqlamasında vurğulayıb ki, bu yay Qarabağ münaqişə zonasında son iki il ərzində ən ciddi toqquşmalar baş verib. Semnebi xəbərdar edib ki, Dağlıq Qarabağda vəziyyət nəzarətdən çıxa bilər.
“Düşünürəm ki, hər iki tərəf artmaqda olan risk və itkiləri anlayırlar, lakin hər zaman nəyinsə nəzərətdən çıxması təhlükəsi mövcuddur. Hər iki tərəfdən bir çoxları, məsələn, hərbçilər qıcıqlanıb. Əgər belə bir vəziyyətdə nəsə baş versə, onda situasiya asanlıqla nəzarətdən çıxa bilər və biz buna çox ciddi yanaşmalıyıq”, –deyə Semnebi bildirib.
Semnebi atəşkəs rejiminin gücləndirilməsi vacibliyini bildirib və buna atəşkəs zonasında daha artıq sayda beynəlxalq müşadəçilərin yerləşdirilməsi yolu ilə nail olmanın mümkünlüyünü deyib. Onun sözlərinə görə, ATƏT-in 6 nəfərdən ibarət monitorinq missiyasının baş verən insidentlərin araşdırılmasında imkanları məhduddur.
