“Çox təəssüf edirik ki, Təhsil Nazirliyinə istinad edərək “Sputnik” Beynəlxalq Mətbuat Mərkəzində təhsil eksperti Nadir İsrafilov qeyd edib ki, guya 30 min şagird bu il ümumi təhsil müəssisələrinə gedə bilməyəcək. Birmənalı deyirik ki, bu yalan informasiyadır və Təhsil Nazirliyi adından heç vaxt belə bir rəqəm səslənməyib”.
Modern.az xəbər verir ki, bu açıqlama ilə Təhsil Nazirliyi çıxış edib. Bildirilib ki, Təhsil Nazirliyinin rəsmiləri müxtəlif tədbirlərdə hər il birinci sinfə gedən uşaqların sayının artdığını qeyd ediblər.
“Məsələn, bu il ümumi təhsil müəssisələrinin I sinfinə 164 mindən çox şagird gedəcək. Ötən tədris ilində isə 156 877 nəfər şagird qəbul olunub ki, buradan da müsbət demoqrafiya aydın görünür.
Biz Nadir müəllimdən xahiş edirik ki, informasiyanı verərkən dürüst statistikaya əsaslansın və olmayan rəqəmləri şərh etməsin. O ki qaldı hörmətli ekspertin qəbul imtahanlarında balların aşağı düşməsi fərziyyəsinə, TQDK-nın aşağıda təqdim olunan statistikası buna ən yaxşı cavabdır.
2016-2017-ci tədris ili üçün qəbul imtahanlarının nəticələrində müsbət dinamika müşahidə edilir. Belə ki, bu il qəbul imtahanlarında 200-dən yuxarı bal toplayanların sayı rekord sayda - 34 385 nəfər (43,8%) təşkil edib ki, bu da ötənilki göstəricidən 3,8%, 2014-ci ildəki göstəricidən 9,1% artıqdır. 2015-ci ildə 200-dən yuxarı bal toplayanların sayı 33 198 nəfər (40%), 2014-cü ildə isə 32 159 nəfər (34,7%) təşkil edib”, Təhsil Nazirliyinin mətbuat xidmətindən bildirilib.
Modern.az
