Հայաստանի՝ գազամատակարարումը դիվերսիֆիկացնելու ցանկությունը կարող է նոր հնարավորություններ ստեղծել Ադրբեջանի հետ էներգետիկ համագործակցության համար։ Դրա իրականացումը, առաջին հերթին, կախված է Բաքվի և Երևանի միջև քաղաքական հարաբերությունների կարգավորումից։
Այս մասին Modern.az-ին տված հարցազրույցում հայտարարել է Միլի Մեջլիսի Տնտեսական քաղաքականության, արդյունաբերության և ձեռներեցության հանձնաժողովի նախագահի տեղակալ Ազեր Բադամովը։
Պատգամավորը նշել է, որ Հայաստանի և Ռուսաստանի միջև վերջին շրջանում նկատվող լարվածության ֆոնին ժամանակ առ ժամանակ օրակարգ է մտնում նաև էներգետիկ հարցը։
«Ռուսաստանի կողմից Հայաստանին արտոնյալ պայմաններով գազի մատակարարման վերաբերյալ որոշակի հաղորդագրություններ են հնչել։ Հայաստանի կառավարությունը բացահայտ հայտարարում է, որ շահագրգռված է գազի ներմուծման դիվերսիֆիկացմամբ։ Ռուսական գազի Հայաստան փոխադրման տեխնիկական պատճառներով առաջացած ընդհատումները նույնպես արդիականացնում են այլընտրանքային աղբյուրների հարցը»։
Ա. Բադամովի խոսքով, նման ընդհատումների ժամանակ Ադրբեջանական գազի Հայաստան մատակարարման գործնական հնարավորությունը որոշակի նախադեպ է ստեղծել ապագա համագործակցության համար։
«Ադրբեջանի և Հայաստանի միջև հարաբերությունների կարգավորման և խաղաղության օրակարգի առաջընթացի ֆոնին էներգետիկ ոլորտում համագործակցության նոր հնարավորությունների ստեղծումը միանգամայն իրատեսական է։ Եթե Հայաստանը ցանկանում է դիվերսիֆիկացնել իր գազամատակարարումը, ապա Ադրբեջանը կարող է լինել աշխարհագրական առումով ամենահարմար և բնական այլընտրանքներից մեկը»։
Պատգամավորն ընդգծել է, որ խոսքը Հայաստանի՝ Ռուսաստանից էներգետիկ կախվածությունը Ադրբեջանով փոխարինելու մասին չէ։
«Հիմնական խնդիրը Հայաստանի էներգետիկ անվտանգության ապահովումն է և գազամատակարարման դիվերսիֆիկացումը տարբեր աղբյուրների հաշվին։ Հաղորդակցությունների վերականգնումը և Զանգեզուրի միջանցքի բացումը կարող են նաև նոր հնարավորություններ ստեղծել ապագայում էներգետիկ ենթակառուցվածքների զարգացման համար։ TRIPP նախագծի շրջանակներում նախատեսված ենթակառուցվածքների իրականացումը լրացուցիչ հնարավորություն կտա ընդլայնելու տրանսպորտային և էներգետիկ կապերը տարածաշրջանում»։
Ա. Բադամովը հայտարարել է, որ Ադրբեջանը շահագրգռված է տարածաշրջանում փոխշահավետ համագործակցությամբ։
«Եթե տարածաշրջանում ապահովվի խաղաղություն և կայունություն, ապա լայն հնարավորություններ կբացվեն տնտեսական և էներգետիկ համագործակցության համար։ Հետևաբար, Հայաստանի կողմից ապագայում ադրբեջանական գազի օգտագործումը, իմ կարծիքով, բավականին իրատեսական սցենար է։ Դրա իրականացումը կախված կլինի քաղաքական հարաբերությունների կարգավորումից, հաղորդակցությունների բացումից և փոխադարձ վստահության ձևավորումից։ Խաղաղությունը կարող է փոխել ոչ միայն քաղաքական հարաբերությունները, այլև տարածաշրջանի էներգետիկ քարտեզը և տնտեսական կապերը»։
