“Təhsil haqqında” qanuna dəyişiklik layihəsində əsaslı bir yenilik yoxdur. Sadəcə “Peşə təhsili haqqında” qanuna dəyişiklik olacaq. “İlk peşə təhsili ixtisas sözü” “peşə təhsili” sözü ilə əvəzlənir. Ona uyğun da aidiyyatı qurumlar da düzəlişlər edəcək”.
Bunu Modern.az-a açıqlamasında Milli Məclisin Elm və təhsil komitəsinin sədri İsa Həbibbəyli deyib.
Komitə sədri bildirib ki, hələlik “Ali təhsil haqqında” qanun layihəsinin hazırlıqlarına başlanılmayıb.
“Hələ "Ümumi təhsil haqqında" qanun layihəsinin müzakirələri başa çatmayıb. Bildiyiniz kimi, ikinci oxunuşdan keçib. Sabahkı plenar iclasda isə sonuncu-üçüncü oxunuşda müzakirələrə çıxarılıb qəbul olunacaq.
Bu qanun layihəsi müzakirə olunduqdan və qayğılarımız bitdikdən sonra “Ali təhsil haqqında” qanun layihəsinin hazırlıqlarına başlayacağıq. Aprelin sonu və mayın əvvəlində İşçi qrupu yaratmaq barədə fikirləşəcəyik. İşçi qrupu yarandıqdan sonra konkret işə başlamaq olacaq”.
