Ürəkmi ürəyimiz dözür bu dağa, Laçınım?!
Əlimizdən aldı səni bir alçaq dığa, Laçınım!
****
Qoyduq ar edib papağı, günə verdik neçə il,
Sənsiz necə yaraşır bu baş papağa, Laçınım?!
****
Neçə oğlun döyüşdü, tökdü qan, oldu şəhid,
Sənə dönük çıxanlar indi xan-ağa, Laçınım!
****
Düşdük hərəmiz bir elə, könlü dağ, qəlbi yanıq,
Bizə “qaşqın” dedilər- gəldik qınağa, Laçınım!
****
Ruhumuz etdi pərvaz, qondu Qirxqız zirvəsinə,
Gözümüz Qaragölü çıxdı sorağa, Laçınım!
****
Həkəri qəlbimizdə ağladı qan, döndü Kürə,
Çırpındı, sığışmadı bəndə-dayağa, Laçınım!
****
Dedik dəli olarıq, şükür, yerində əqlimiz,
Çatdımı yetmiş min əql bir Dəlidağa, Laçınım?!
****
Ölmədik ki, yaşadıq, tapdıq hər qazanc yolu,
Bulduqmu sənə yetən bir yol-yolağa, Laçınım?!
****
Baş, dil-ağız, əl-ayaq işlədi, cəm etdi ruzi,
Çiynimiz yadırğadı amma qundağa, Laçınım!
**
Çəkdi çoxumuz dərdü-qəm, bir para zövqü-səfa,
Satdı səni rütbəyə, yala-yalağa, Laçınım!
***
Susduq, ama ki, verdik hər yetənə bolluca səs-
Yetmədi bir sədamız İşıqlı dağa, Laçınım!
***
Məhəbbət dərd elədi - qoşdu “Laçınım” oxudu,
Biz qol açdıq, oynadıq, cumduq arağa, Laçınım!
***
İçdik məclisdə hər şər ab, narzan, fanta, pepsi, kola-
Təşnə qaldı canımız Turşsu bulağa, Laçınım!
***
Bişdik hər yay aranda, gah çadırda, gah vaqonda,
Tapmadıq Çalbayırı – qalxaq yaylağa, Laçınım!
***
Könlümüz bumbuz bulaq, büllur hava, dağ istədi,
Yollandıq qəlbiqara Qubaya, Qaxa, Laçınım!
***
Hanı at üstdə gəzdiyin zümrüd quzey, boz güneyin?
“Mersedes”lə Bakıda düşdük bozağa, Laçınım!
***
“Atəşkəs” dövründə şou, pul, maşın qatdı başı-
Aldandıq Abşeronda beş sot torpağa, Laçınım!
****
İcad etdik hər cürə saxta sənəd, saxta məktəb,
Əslimiz dağda qaldı, döndük yaltağa, Laçınım!
****
Mədh etdik zülmkarı, qardaş olduq yem verənə -
Başladıq nəslimizdən “danos” yazmağa, Laçınım!
****
Bir dəfə hayqırmadıq var gücümüzlə adını –
Yardım üstə, ev üstə qalxdıq ayağa, Laçınım!
***
Saxlatdıq oğlumuzu əsgərlikdən rüşvət verib-
Vəzifə davasında döndük “qoçağa”, Laçınım!
****
Olduq nəfsin qulu, etmədik Allaha təzim,
Dözmədik iyirmi il sənsiz sınağa, Laçınım!
****
Tanrı əfv etsin bizləri, yetişsin imdadımıza,
Sarılaq eşqinlə bir gün topa-silaha, Laçınım!
***
Sultanın hər namazı bu duayla yetər başa,
Uğrunda o dağlarda düşə torpağa, Laçınım!
Uğrunda o dağlarda düşə torpağa, Laçınım!
