Ermənistan-Türkiyə münasibətlərinin normallaşması ilə bağlı danışıqların gündəliyinə müzakirəsi ictimaiyyətdən gizli aparılan sənəd daxildir.
Modern.az xəbər verir ki, bu barədə jurnalistlərə açıqlamasında Ermənistan parlamentinin vitse-spikeri, “Hayastan” fraksiyasının deputatı İşxan Saqatelyan bildirib.
"Danışıqlar davam edərsə, bu, müxalifətçi deputatın nöqteyi-nəzərindən Ermənistan-Türkiyə barışığı ilə bağlı sənədin müzakirə olunduğu anlamına gəlir. Bu sənəddə erməni xalqının maraqları pozulacaq və Türkiyənin bütün ilkin şərtləri xalqdan gizli qəbul ediləcək”, - deyə erməni deputat iddia edib.
Qeyd edək ki, İrəvan və Ankara ötən ilin sonunda normallaşma üzrə danışıqlar üçün xüsusi nümayəndələrini təyin ediblər. Danışıqlarda Ermənistanı parlamentin vitse-spikeri Ruben Rubinyan,Türkiyəni isə ölkənin ABŞ-dakı keçmiş səfiri Serdar Kılıç təmsil edir.
Yanvarın 14-də Moskvada ilk görüş olub. Danışıqlar zamanı tərəflər konstruktiv, siyasiləşdirilməmiş şəkildə dialoq aparmağa hazır olduqlarını nümayiş etdiriblər. Növbəti görüşün fevralın 24-də Vyanada keçirilməsi planlaşdırılır.
Qeyd edək ki, indiyədək Türkiyə ilə Ermənistan arasında diplomatik əlaqələr mövcud olmayıb, iki ölkə arasında sərhəd 1993-cü ildən Ankaranın təşəbbüsü ilə bağlıdır.
