Gəncə Dövlət Universitetinin pedaqoji kollektivinə ağır itki üz verib.
Modern.az xəbər verir ki, universitetin Riyaziyyat – informatika fakültəsinin Fəxri Professoru Quliyev Əliqulu Umud oğlu 18 oktyabr 2022-ci il tarixdə vəfat edib.
Quliyev Əliqulu Umud oğlu 1939-cu ildə İmişli rayonunun Sarıxanlı kəndində zəhmətkeş ailədə dünyaya göz açıb. Hələ dünyaya gəlməmiş atasını itirmiş, 7 yaşında ikən taleh onu anadan da məhrum etmiş, bir-birindən bir yaş fərqi olan üç bacısı ilə birlikdə yetimçilik həyatı ilə üzləşmişdir. Nəhayət, zaman öz axarı ilə gəlib keçmiş, Əliqulu da orta məktəbi əla qiymətlərlə başa vurmuşdur. 1959-cu ildə Kirovabad Dövlət Pedaqoji İnstitutunun (hazırki Gəncə Dövlət Universitetinin) fizika-riyaziyyat fakültəsinə daxil olaraq 1964-cü ildə İnstitutu fərqlənmə diplomu ilə bitirərək Xaldan orta məktəbində əmək fəaliyyətinə başlamışdır. Əliqulu müəllim orta məktəbdə işləməklə yanaşı 1966-cı ildə Azərbaycan Elmlər Akademiyasının Riyaziyyat-Mexanika İnstitutunun aspiranturasına daxil olmuşdur. 1967-ci ildə müsabiqədən keçərək bitirdiyi İnstitutda müəllim kimi fəaliyyətini davam etdirib.
1974-cü ildə Ə.Quliyev aspirant olduğu Riyaziyyat-Mexanika İnstutunda «Məxsusiyyəti olan polinomial əmsallı adi diferensial tənliklərin ümumiləşmiş funksiyalar fəzasında həlli» mövzusunda dissertasiya müdafiə edərək fizika-riyaziyyat elmləri namizədi alimlik dərəcəsi almışdır. Onun yaradıcılıq işini görkəmli riyaziyyatçılar Q.E.Şilov, C.Allahverdiyev, F.Maqsudov və başqaları yüksək qiymətləndirmişlər. Bu o dövrə təsadüf edirdi ki, artıq 5 il idi ki, hakimiyyətə gəlmiş əvəzolunmaz şəxsiyyət Heydər Əliyev Respublikada elmin və mədəniyyətin inkişafını öz himayəsinə götürərək ona böyük diqqət yetiririb.
Əliqulu müəllim 42 ilə yaxın tələbələrin təhsili və təlim-tərbiyəsi ilə məşğul olub. Öz peşəkarlığı, tələbkarlığı ilə seçilən Əliqulu müəllim professor-müəllim heyətinin, tələbələrin dərin hörmət və rəğbətini qazanıb.
Əliqulu müəllim uzun müddət Gəncə Dövlət Universitetində Riyazi analiz kafedrasına, sonralar Riyaziyyat-informatika fakültəsinə başçılıq etmiş, Azərbaycanda və xarici ölkələrdə 100-dən çox elmi əsərlər çap etdirmişdir. O, iri həcmli bir monoqrafya və tələbələrin istifadəsinə verilmiş 10 dərs vəsaitinin müəllifidir.
Əliqulu müəllim səmərəli elimi-pedaqoji fəaliyyətinə görə dəfələrlə Universitet rektorunun təşəkkür və fəxri fərmanına, 1999-cu ildə Azərbaycan Respublikası Təhsil Nazirliyinin təşəkkürünə, 2004-cü ildə fəxri fərmanına layiq görülmüşdür. Azərbaycan Respublikası Prezidentinin 22 aprel 2009-cu il tarixli fərmanı ilə Respublika üçün müəllim kadrları hazırlanmasında fəaliyyətinə görə Ə.U.Quliyev «Tərəqqi medalı» ilə təltif olunmuş, Azərbaycan Respublikası Təhsil Nazirliyinin 9 dekabr 2014-cü il əmri ilə “Qabacıl təhsil işçisi” döş nişanı ilə, Azərbaycan Respublikası Prezidentinin 31 oktyabr 2018-ci il tarixli sərəncamı ilə “Əməkdar müəllim” adına layiq görülüb.
Gəncə Dövlət Universitetinin və eləcə də Riyaziyyat-informatika fakültəsinin inkişafında əvəzsiz xidmətləri olmuş Əliqulu Umud oğlu Quliyevin əziz xatirəsi onu tanıyanların xatirəsində daim yaşayacaqdır.
Allah rəhmət eləsin!
