Ombudsman Aparatının əməkdaşları Müdafiə Nazirliyi ilə və Daxili Qoşunların komandanlığı ilə razılaşdırılmış plan-cədvələ uyğun olaraq, bu günlərdə hərbi hissələrdə görüşlər keçiriblər.
Ombudsman Aparatının mətbuat xidmətindən Modern.az-a bildirilib ki, görüşlərdə məqsəd əsgər və zabitlərin yaşayış və xidmət şəraiti, asudə vaxtlarının səmərəli təşkili üçün görülmüş işlər, göstərilən tibbi xidmət, qidalanma rejimi, həmçinin hərbi qulluqçular arasında Nizamnaməyə uyğun rəftarın vəziyyəti ilə tanış olmaq, Ombudsmanın hüquq və səlahiyyətlərini izah etmək, insan hüquqları sahəsində fəaliyyəti barədə məlumat verməkdir.
Qusar rayonu ərazisində yerləşən, Müdafiə Nazirliyinin tabeliyində olan "N" saylı hərbi hissəsində keçirilmiş görüşdə Ombudsman Aparatı Hərbi qulluqçuların hüquqlarının müdafiəsi sektorunun müdiri Fəzail Həsənov və Müdafiə Nazirliyinin əməkdaşı Rauf Əliyev iştirak edib.
Hərbi hissələrdə monitorinqlər zamanı müəyyən edilmiş qanun pozuntularının araşdırılması və müvafiq tədbirlər görülməsi üçün məlumatların aidiyyəti icra və hüquq-mühafizə orqanlarına göndərildiyi, pozuntulara yol verən şəxslərin aşkarlandığı və qanunvericilik əsasında cəzalandırıldığı, eyni zamanda belə halların Müvəkkilin illik məruzələrində öz əksini tapdığı qeyd olunub.
Hərbi hissələrin zabitləri şəxsi heyətin döyüş hazırlığının daha da təkmilləşdirildyini söyləyib, səmimi görüş, əsgər və zabitlərin vəziyyəti ilə maraqlandığı üçün Ombudsmanın əməkdaşlarına minnətdarlıqlarını bildiriblər.
Müvəkkilin nümayəndəsi Qusar Hərbi Polisində görüş keçirib, şəxsi heyətin qidalanması vəziyyəti, yaşayış şəraiti ilə tanış olub, keçirilən təlim məşğələləri, şəxsi heyətin döyüş texnikasına yiyələnməsi, asudə vaxtın təşkili vəziyyəti, göstərilən tibbi yardımla maraqlanıblar.
