Əfqanıstan və Çin mayın 24-dən ölkələr arasında birbaşa uçuşlara başlayacaq.
Modern.az xəbər verir ki, bu barədə Əfqanıstanda hakimiyyətdə olan Taliban hərəkatının Xarici İşlər Nazirliyinin mətbuat katibi Əbdül Kahar Bəlxi məlumat verib.
Qərar Taliban hökumətinin xarici işlər naziri Əmir Xan Möttəki ilə Çinin Kabildəki səfiri Vanq Yu arasında keçirilən görüşdən sonra qəbul edilib.
“Səfir bildirib ki, Çin Əfqanıstanla normal münasibətlər saxlayır və bunu daha da gücləndirməyə hazırdır. O əlavə edib ki, Əfqanıstan-Çin birbaşa uçuşları mayın 24-də başlayacaq”, - Bəlxi "Twitter" hesabında yazıb.
O, hansı aviaşirkətlərin uçuşlara başlayacağını və digər detalları açıqlamayıb.
Əmir Xan Möttəki "Twitter" hesabında Çin və Əfqanıstan arasında uçuşların başlanmasını “münasibətləri gücləndirmək üçün yaxşı fürsət” adlandırıb. O, həmçinin Pekini ölkələr arasında viza rejimini sadələşdirməyə çağırıb.
Xatırladaq ki, may ayında Çin, Pakistan və Taliban Əfqanıstanı Çinin “Bir kəmər, bir yol” təşəbbüsünə daxil etmək barədə razılığa gəliblər. "Bloomberg" agentliyi yazıb ki bu, Kabilə infrastruktur layihələrini maliyyələşdirmək üçün milyardlarla investisiya cəlb etməyə imkan verə bilər.
