ABŞ Prezidenti Donald Tramp xalqa müraciətlə çıxış edərək Çinin 2020-ci il prezident seçkilərinə müdaxilə etdiyini iddia edib.
Modern.az xarici KİV-ə istinadən xəbər verir ki, Trampın sözlərinə görə, məxfiliyi ləğv edilmiş kəşfiyyat materialları Pekinin ABŞ seçki prosesinə təsir göstərməyə çalışdığını göstərir.
ABŞ prezidenti bildirib ki, ölkənin seçki sisteminə ciddi zərbə dəyib və vətəndaşların seçkilərə olan etimadı sarsılıb.
“Ölkəmizə böyük ziyan vurulub. Seçkilərimiz saxtakarlıq və oğurluq üçün həssas vəziyyətə düşüb, Amerika xalqının etimadı itirilib. Buna yol vermək olmaz. Respublikaçı, demokrat və ya müstəqil olmasından asılı olmayaraq hər bir amerikalı dünyanın ən etibarlı, ən ədalətli seçki sisteminə layiqdir”, – deyə Tramp vurğulayıb.
25 dəqiqə davam edən müraciətində Tramp açıqlanan sənədlərin ABŞ seçki infrastrukturundakı “şokedici boşluqları” üzə çıxaracağını bildirib.
Onun sözlərinə görə, məxfiliyi ləğv edilən məlumatlar Çinin qanunsuz şəkildə 220 milyon amerikalı seçicinin məlumat bazasına çıxış əldə etdiyini göstərir. Tramp iddia edib ki, həmin məlumatlar arasında seçicilərin adları, ünvanları və səsvermə qeydiyyatı üçün istifadə olunan digər şəxsi bilgilər də yer alıb.
ABŞ prezidentinin açıqlamaları ölkədə yeni siyasi müzakirələrə səbəb olub.
