ABŞ administrasiyası İrana qarşı daha genişmiqyaslı hərbi əməliyyatlara hazırlaşır.
Modern.az xəbər verir ki, bu barədə The Washington Post nəşri məlumatlı mənbələrə istinadən yazıb.
Məlumata görə, Vaşinqton bu məqsədlə Yaxın Şərqdə hərbi iştirakını artırır. Bölgəyə əlavə F-16 və F-35 qırıcıları, eləcə də havada yanacaq dolduran təyyarələr göndərilir.
Nəşrin həmsöhbətlərindən biri bildirib ki, ABŞ uzunmüddətli və genişmiqyaslı müharibə aparmaq imkanında deyil. Buna səbəb raket əleyhinə müdafiə sistemləri üçün kəsici raket ehtiyatlarının azalması, uzaqmənzilli raket çatışmazlığı və İranın hücumları nəticəsində zərər görmüş hərbi bazalardan istifadə ilə bağlı problemlərdir.
Eyni zamanda, ABŞ ordusunun itkiləri də artır. ABŞ Mərkəzi Komandanlığı (CENTCOM) iyulun 19-da İraqda daha bir amerikalı hərbçinin öldüyünü açıqlayıb. Bununla da son günlərdə həlak olan ABŞ hərbçilərinin sayı daha da yüksəlib.
Mənbələrin sözlərinə görə, Pentaqon hesab edir ki, İran son aylarda Yaxın Şərqdə yerləşdirilmiş ABŞ-ın hava və raketdən müdafiə sistemlərini aşmaq üçün yeni taktika və texnologiyalar tətbiq etməyə başlayıb.
Ekspertlər bildirirlər ki, Vaşinqtonun hərbi hazırlığı ilə bağlı xəbərlər bölgədə gərginliyin daha da artacağından xəbər verir. Bununla yanaşı, ABŞ-ın hərbi resursları və logistik imkanları uzunmüddətli müharibə perspektivini sual altına qoyur.
