Ermənistanda Mərkəzi Seçki Komissiyası (MSK) iyulun 21-də keçirilən iclasında ümumilikdə 38 deputatlığa namizədin qeydiyyatını onların mandatdan imtina etməsi ilə əlaqədar etibarsız sayıb.
Modern.az Ermənistan KİV-nə istinadən xəbər verir ki, mandatdan imtina edənlər parlamentə düşən üç siyasi qüvvəni təmsil edirlər.
Hakim "Vətəndaş Müqaviləsi" Partiyasından 27 namizəd deputat mandatından imtina edib. Onların arasında Baş nazir Nikol Paşinyan, xarici işlər naziri Ararat Mirzoyan, müdafiə naziri Suren Papikyan, parlamentin sədri Alen Simonyan, səhiyyə naziri Anait Avanesyan, İrəvan meri Tiqran Avinyan, keçmiş yüksək texnologiyalar sənayesi naziri Mxitar Ayrapetyan və digər tanınmış hakimiyyət nümayəndələri yer alıblar. Nəticədə partiyadan Milli Məclisə 64 deputat mandatı verilib.
Müxalifətdəki "Ermənistan" blokundan yalnız siyahının lideri, ölkənin sabiq prezidenti Robert Koçaryan mandatdan imtina edib. Onun əvəzinə blokun digər namizədləri parlamentdə təmsil olunacaqlar.
"Güclü Ermənistan" blokundan isə 10 namizəd deputat mandatından imtina barədə ərizə təqdim edib.
Beləliklə, Ermənistanın IX çağırış Milli Məclisinin formalaşdırılması prosesində 38 deputatlığa namizəd könüllü şəkildə mandatdan imtina edib, onların yerini seçki siyahılarında növbəti namizədlər tutublar. Bu qərar MSK tərəfindən rəsmən təsdiqlənib.
