Modern.az

Bakı metrosunda sərnişinlər üçün canlı musiqi təqdim olunub

Bakı metrosunda sərnişinlər üçün canlı musiqi təqdim olunub

18 Sentyabr 2019, 15:09

18 Sentyabr – Milli Musiqi Gününün Bakı Metropolitenində xüsusi layihələrlə qeyd edilməsinin artıq 5-ci ili tamam olur.

 

Modern.az-ın məlumatına görə, sərnişin axınının gur olduğu bir neçə stansiyası hər il bu bayramın ovqatına köklənir. Bu gün də səhər saat 11-dən başlayaraq, günorta saatlarına qədər metronun “İçərişəhər”, “Sahil”, “28 May” və “Elmlər Akademiyası” stansiyaları növbə ilə sərnişinləri canlı musiqi sədaları altında qarşılayıblar.

 

Metropolitenin çoxsaylı sosial layihələrindən biri olan bu tədbirin proqramına milli və klassik musiqi nümunələri və xüsusən də Üzeyir Hacıbəylinin əsərlərindən parçalar daxil edilib.

 

Dahi Azərbaycan bəstəkarı Üzeyir Hacıbəylinin doğum günü- 18 sentyabr tarixi Ümummilli lider Heydər Əliyevin təşəbbüsü və 1995-ci ildə imzaladığı Fərmanla Azərbaycanda hər il Milli Musiqi Günü kimi təntənə ilə qeyd olunur.

 

Metro stansiyalarında peşəkar ifaçılar sərnişinlərdə günün ruhuna uyğun ovqat yaradıblar. Bunu stansiyaya daxil olan və ya oranı tərk edən insanların ayaq saxlayıb musiqiyə diqqət kəsilmələrindən, alqışlardan görmək olurdu. Onların arasında stansiya işçilərinə yaxınlaşaraq, təşəkkürünü bildirənlər də oldu.

Telegram
Hadisələri anında izləyin!
Keçid et
Son dəqiqə- Paşinyan Qazaxın Əskipara kəndinə gəldi