Vyaçeslav Volodinin Rusiyanın yeni çağırış Dövlət Dumasında da spiker vəzifəsini saxlayacağı bildirilir. Rusiya parlamentində bu qərarın artıq qəbul edildiyi iddia olunur.
Modern.az xəbər verir ki, bu barədə RBC iki federal məmura və Rusiya Prezident Administrasiyasına yaxın məlumatlı mənbəyə istinadən yazıb.
Dövlət Dumasındakı mənbənin sözlərinə görə, Volodinin vəzifəsində qalması ilə bağlı qərar artıq qəbul edilib.
Bununla belə, mənbə qeyd edib ki, bu səviyyəli qərarları yekun olaraq yalnız prezident qəbul edir. Dumadakı iki mənbə belə qərarların hətta yeni çağırışın ilk plenar iclası ərəfəsində dəyişə biləcəyini istisna etməyib.
Mənbələrin sözlərinə görə, Volodin parlamentin yeni tərkibinin formalaşdırılması ilə bağlı müzakirələrdə fəal iştirak edib. Onlar bildiriblər ki, Volodinin mövqeyi nəzərə alınmalıdır, çünki yeni Dumaya məhz onun rəhbərlik edəcəyi gözlənilir.
Əgər Volodinin spiker səlahiyyətləri uzadılarsa, bu, Rusiya parlamenti tarixində rekord olacaq. İndiyədək heç bir siyasətçi Dövlət Dumasının sədri vəzifəsində ardıcıl olaraq iki müddətdən çox çalışmayıb. Spiker Dövlət Duması tərəfindən deputatlar arasından seçilir.
Dövlət Dumasına seçkilərdə Vyaçeslav Volodin Saratov vilayətinin daxil olduğu ərazi qrupuna rəhbərlik edib. O, eyni zamanda Saratov vilayətindəki 164 saylı birmandatlı seçki dairəsindən namizəd olub və burada 82,84 faiz səslə qalib gəlib.
Volodin 2016-cı ilin oktyabrından Dövlət Dumasının sədridir. Bundan əvvəl Rusiya Prezident Administrasiyası rəhbərinin birinci müavini və hökumət aparatının rəhbəri – baş nazir müavini vəzifələrində çalışıb. 2003–2010-cu illərdə isə Dövlət Dumasının sədr müavini olub.
Rusiya Dövlət Dumasının IX çağırışına seçkilər sentyabrın 18–20-də keçirilib. Yeni çağırış 450 deputatdan ibarət olacaq.
