Modern.az xəbər verir ki, “Azərbaycanla İtaliya arasında təhsil sahəsində əməkdaşlıq: mövcud vəziyyət və perspektivlər” mövzusunda ikigünlük konfransda çıxış edən Azərbaycanın İtaliyadakı səfiri Vaqif Sadıqlı Azərbaycan-İtaliyanın qarşılıqlı əməkdaşlığından danışarkən qeyd edib ki, hələ qədim vaxtlardan Azərbaycan-İtaliya arasında qarşılıqlı münasibətlər olub: “Hətta Qobustan qayaüstü rəsmlərində də bu münasibətlərin olduğu sübut olunur. 1918-1920-ci illərdə Azərbaycan və İtaliya arasında diplomatik əlaqələr inkişaf edib. Hətta 1972-ci ildə Bakı və Neapol şəhərləri qardaşlaşmış şəhərlər elan olunub”.

Səfir onu da qeyd edib ki, 1991-ci ildə Azərbaycanın müstəqilliyini tanıyan ilk dövlətlərdən biri də İtaliyadır. O bildirib ki, Azərbaycanın xarici ticarət dövriyyəsinin 29%-i İtaliyanın payına düşür. Bu gün İtaliyaya neft ixrac edən ölkələr sırasında Azərbaycan 4-cü yerdədir.

İtaliyanın Azərbaycandakı səfiri Mario Baldi çıxışında deyib ki, İtaliya-Azərbaycan əməkdaşlığı təkcə enerji, neft sahəsində əməkdaşlıq deyil, bu insan enerjisidir, insan ehtiyatıdır: “Bu, neftdən də daha önəmli bir enerjidir. Biz Azərbaycanı gəzərkən özümüzü başqa bir yerdə deyil, sanki İtaliyanın özündə hiss etdik. Buradakı insanların yaşayış, qavrayış tərzi italyan xalqına çox yaxındır”.  

Şahanə Rəhimli