“Xırdalanda baş verən hadisə ilə əlaqədar 8 nəfər zərərçəkən xəstəxanaya yerləşdirilib. Onlardan bir nəfər artıq evə yazılıb. Həmin xəstələrin 1-i Sumqayıt Mərkəzi Xəstəxanasının travmatologiya şöbəsinə, 2 nəfər Respublika Yanıq Mərkəzinə yerləşdirilib. Yanıq Mərkəzinə yerləşdirilənlərdən Vidadi İsmayılov ağır vəziyyətdədir”.
Bunu Modern.az-a açıqlamasında Səhiyyə Nazirliyinin mətbuat xidmətinin rəhbəri Anar Qədirli baş vermiş faciəli hadisədə xəsarət alanların son durumu haqqında məlumat verərkən bildirib.
Nazirlik rəsmisinin sözlərinə görə, xəsarət alanlardan 5 nəfər Kliniki Tibbi Mərkəzə (KTM) aparılıb. Bura gətirilən xəstələrdən bir Respublika Uşaq Neyrocərrahiyyə Xəstəxanasına köçürülüb, 3 nəfər isə KTM-də müalicəsini davam etdirir.
Bir nəfərin isə dağıntılar altından meyiti çıxarılıb. Xəstəxanaya yerləşdirildikdən sonra ölüm faktı qeydə alınmayıb.
Kliniki Tibbi Mərkəzdən Modern.az-a verilən məlumata görə hazırda 4 nəfər bu xəstəxanada müalicə alır. 2007-ci il təvəllüdlü Bəkir İsmayılov bədənin çoxsaylı əzilmələri, 2010-cu il təvəllüdlü Aytac Abdullayeva bədənin küt travması ilə xəstəxananın uşaq şöbəsinə yerləşdirilib.
Mətanət İsmayılova KTM-in reanimasiya şöbəsindədir, vəziyyəti ağırdır. Onun qızı 15 yaşlı Aygün İsmayıllı I cərrahiyyə şöbəsində müalicə alır.
Qeyd edək ki, İsmayılovlar ailəsinin bütün 5 üzvü hadisə nəticəsində xəsarət alıb. Ailə başçısı, jurnalist Vidadi İsmayılovun vəziyyəti ağır qiymətləndirilir.
Respublika Yanıq Mərkəzinin baş həkimi Vüqar Ələkbərovun Modern.az-a verdiyi məlumata görə, onun bədəninin 90%-i yanıb, həyati təhlükəsi var. Onun 13 yaşlı oğlu Yunus İsmayılov nisbətən az yanıb. Hər iki ətrafın yanığı diaqnozu ilə xəstəxanaya daxil olub, bədənin 30%-i yanıb, palataya yerləşdirilib.
Məlumat üçün bildirək ki, hadisə bu gün Abşeron rayonu, Xırdalan şəhərində tikintisi başa çatmamış beşmərtəbəli yaşayış binasında baş verib.
Gülşən RAUFQIZI
