Dağlıq Qarabağdakı separatçı rejimin “əsir və itkin düşmüş şəxslərlə bağlı komissiyası” yaydığı məlumatda 15 yaşlı Azərbaycan vətəndaşını geri qaytarmağa hazır olduqlarını bildiriblər. Modern.az saytı Ermənistan mətbuatına istinadən xəbər verir ki, qondarma qurum bunu Cenevrə Konvensiyasının tələblərinə uyğun qaydada həyata keçirmək istəyir.
““Dağlıq Qarabağ Respublikası”nın rəhbərliyi Cenevrə Konvensiyasının tələblərinə uyğun olaraq 2014-cü il sentyabrın 5-də ərazimizə kemiş Məmmədov Cavid Samir oğlunu geri qaytarmağa hazırdır”odeyə separatçı rekimin qondarma komissiyası bəyan edib.
Xatırladaq ki, sentyabrın 5-dən erməni girovluğunda olan 15 yaşlı II qrup əlil Cavid Məmmədov Tərtər rayon Yol Polisi İdarəsi rəisi müavininin oğludur.
Yeri gəlmişkən, Azərbaycanın insan hüquqları üzrə müvəkkili Elmira Süleymanova 15 yaşlı Cavid Məmmədovun məsələsiylə bağlı Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri xanım Deniz Durana məktubla müraciət edib. Ombudsman beynəlxalq hüquq normalarına riayət etməklə, Azərbaycan vətəndaşı, 15 yaşlı Məmmədov Cavid Samir oğlunun təhlükəsizliyinin təmin edilməsini, işgəncələrə və digər qəddar, qeyri-insani, yaxud ləyaqəti alçaldan davranış və cəzaya məruz qalmasının qarşısının alınmasını, habelə onun ailəsinə qaytarılmasının sürətləndirilməsinə köməklik göstərilməsini xahiş edib.
Modern.az
