Ötən gün Azərbaycan Kommunist Partiyası Mərkəzi Komitəsinin plenumu keçirilib. Bu barədə Modern.az saytına partiyanın sədri Rauf Qurbanov məlumat verib.
Onun sözlərinə görə plenumda 2014 - cü ilin dekabr ayında Azərbaycanda keçiriləcək bələdiyyə seçkilərində Kommunist Partiyası tərəfindən namizədliyi irəli sürüləcək şəxslərin siyahısı təsdiq edilib. Rauf Qurbanov bildirib ki, plenumda təşkilatı məsələlər də müzakirə edilib.
AKP rəhbəri deyib ki, bir müddət öncə onun müavini vəzifəsində işləyən və sonradan bu vəzifədən azad edilən Gülnisə Maksimova ümumiyyətlə partiya sıralarından xaric edilib.“Partiya daxilində təxribat fəaliyyəti ilə məşğul olduğuna, üzvlər arasında ədavət, qarşıdurma yaratmağa cəhd göstərdiyinə, kommunistə yaraşmayan hərəkətlərə yol verdiyinə görə Gülnisə Maksimova Azərbaycan Kommunist Partiyası sıralarından xaric edilib”,-deyə Rauf Qurbanov söyləyib.
Qeyd edək ki, Rauf Qurbanov Gülnisə Maksimovanın müavin vəzifəsindən kənarlaşdırıldıqdan sonra ayrıca fraksiya yaratmaq istədiyini bildirmişdi.
Aqşin Kərimov
