Quba rayonu seçicilərini Milli Məclisdə təmsil edən Vahid Əhmədov rayon mərkəzində yerləşən ofisində seçiciləri ilə görüşüb. Modern.az-ın verdiyi məlumata görə, deputat seçicilərini təkbətək qəbul edib. Məlumatda qeyd edilir ki, qəbulda Vahid Əhmədovun seçiciləri olan qonşu Xaçmaz və Şabran rayonlarının sakinləri də iştirak ediblər.
Qəbul zamanı mənzillərin verilməsi, sosial yardımların təyin olunması, ev təmiri üçün inşaat materiallarının paylanması, ev tikintisi üçün torpaq sahələrinin ayrılması, məhkumların əfv olunması və digər məsələlər qaldırılıb. Operativ və yerində həll edilməsinə üstünlük verən deputat bir çox məsələləri rayonda fəaliyyət göstərən aidiyyəti təşkilatlar qarşısında qabardaraq, həlli yollarını arayıb, qalanlarını nəzarətə götürərək mərkəzi təşkilatlara sorğu göndərməyi planlaşdırıb.Qəbuldan sonra şəhərdə aparılan abadlıq və quruculuq işləri ilə tanış olan Vahid Əhmədov rayon İcra Hakimiyyətində olub, keçirdiyi qəbulla bağlı mülahizələrini bölüşüb.
