ATƏT-in Minsk qrupunun həmsədr ölkələrindən biri olan Rusiya ötən gün cəbhə xəttində Azərbaycan tərəfinin Ermənistan ordusuna məxsus helikopteri vurmasına münasibət bildirib.
Modern.az saytı Rusiya KİV-nə istinadən xəbər verir ki, Rusiya Xarici İşlər Nazirliyinin rəsmi nümayəndəsi Aleksandr Lukaşeviç baş vermiş hadisəni şərh edib.
O bildirib ki, Azərbaycan və Ermənistan sülhlə bağlı üzərlərinə götürdüyü məsuliyyətə əməl etməlidir: “Münaqişənin həlli üzrə sülh öhdəliklərinin icrası haqqında Azərbaycan və Ermənistan rəhbərliyinə xatırladırıq ki, onlar Soçidə və Parisdə bunu öz üzərlərinə götürdülər.Bu cür addımlardan çəkinmək lazımdır. Bu regionda gərginliyin eskalasiyasına aparır”,-deyə Rusiya XİN rəsmisi qeyd edib.
Noyabrın 12-də cəbhənin Ağdam rayonu istiqamətində Ermənistan Respublikasının Hərbi Hava Qüvvələrinə məxsus döyüş cütlüyündən ibarət Mi-24 tipli helikopterləri müdafiənin ön xəttində yerləşən mövqelərimizə hücum edərək atəşə tutublar. Azərbaycan ordusu isə döyüş cütlüyündən ibarət helikopterlərindən birini vurub, digəri isə atəş zonasını tərk etməyə məcbur olub.
Vurulan helikopterdə Ermənistan ordusuna məxsus 3 nəfər hərbçi ölüb.
Aqşin Kərimov
