Ermənistan parlamentində təmsil olunan üç partiya – “Çiçəklənən Ermənistan”, Erməni Milli Konqresi və “İrs” – hakimiyyətlə danışıqlara getməkdən imtina edib. Modern.az Ermənistan KİV-nə istinadən bildirir ki, bu haqda jurnalistlərə Erməni Milli Konqresinin (EMH) parlament fraksiyasının rəhbəri Levon Zurabyan məlumat verib. Onun sözlərinə görə, EMH hər il dekabrın 10-da – beynəlxalq insan haqlarını müdafiə günündə ənənəvi olaraq nümayişlər keçirir.
Zurabyan bu il həmin aksiyanın daha genişmiqyaslı təşkil ediləcəyini bildirib. O deyib ki, parlamentdə təmsil olunan üçlük dekabrın 10-da yerli vaxtla saat 13:00-da Yerevandakı Azadlıq meydanında mitinq keçirəcək və ümumxalq hərəkatı ilə bağlı gələcək addımlar müəyyənləşdiriləcək:
“Bundan sonra biz Yerevanda möhtəşəm aksiya təşkil etmək haqda düşünürük”.
Zurabyanın sözlərinə görə, Ermənistanda genişmiqyaslı ümumxalq etirazlarının təşkil olunması üçün ölkənin hər tərəfində qərargahlar yaradılır.
Modern.az
