Türkiyə prezidenti Rəcəb Tayyib Ərdoğan zəlzələ ilə bağlı görülən axtarış-xilasetmə işlərini və digər fəaliyyətləri şəxsən koordinasiya edəcək.
Modern.az "TRT Haber"ə istinadən xəbər verir ki, o, Fövqəladə Halların İdarə Olunması Agentliyinin
(AFAD) mərkəzi idarəsinə gedib.
Açıqlamaya görə, AFAD-ın depolarındakı bütün potensialdan istifadə olunmağa başlanıb. 9 region üzrə mərkəzlərdən çadırlar və yük maşınları zəlzələ bölgəsinə çatdırılmaqdadır.
Həmçinin bütün vətəndaşlar qan verməyə dəvət olunub.
Xatırladaq ki, gecə saatlarında Türkiyənin Kahramanmaraş bölgəsində 7,4 bal, Qaziantepdə isə 6,5-6,4 bal gücündə zəlzələ baş verib. Təbii fəlakət zamanı Malatya, Diyarbakır, Adana, Hatay, Kilis və Osmaniye vilayətlərində binalar dağılıb. Son məlumata görə, zəlzələ nəticəsində 284 nəfər ölüb, 2323 nəfər yaralanıb.