Sabahdan "Baku Expo" Mərkəzində Azərbaycanın təhsil sahəsi üzrə yeganə sərgi - 10-cu (yubiley) Beynəlxalq Təhsil Sərgisi öz işinə başlayır.
Modern.az xəbər verir ki, bu gün sərgi ilə bağlı keçirilən mətbuat konfransında Təhsil Nazirliyinin sektor müdiri Cəsarət Valehov bildirib.
O deyib ki, bu, Təhsil Nazirliyinin rəsmi dəstəyi və iştirakı ilə təşkil olunan yeganə tədbirdir. Onun sözlərinə görə, ümumilikdə sərgi çərçivəsində ziyarətçilərə bakalavriat, magistratura, aspirantura, eləcə də ikinci ali təhsil və MBA proqramı, o cümlədən işgüzar xarici dil kursları, təcrübə və treninqlər üzrə proqramlar təqdim olunacaq.
C.Valehov vurğulayıb ki, ziyarətçilər sərgidə aparıcı ali təhsil müəssisələrinin nümayəndələri ilə ünsiyyət quraraq qəbul prosesi, qəbula daha yaxşı hazırlıq, sənəd qəbulu müddəti, təhsil haqqı və digər məsələlərlə bağlı onları maraqlandıran suallara cavab tapmaq imkanı qazanacaqlar:
“Müxtəlif layihələrdə olan brendləri də sərgidə görmək mümkün olacaq. Bu il həm də Azərbaycanda yeni fəaliyyətə başlayan UFAZ Universitetinin stendləri də əks olunacaq. Bütün bunlar təhsil nailiyyətlərinin geniş şəbəkədə yayılması, yeniliklər barədə ictimaiyyətə ətraflı məlumat vermək üçün önəmlidir”.
“Caspian Event Organisers” şirkətinin icraçı direktoru Bəhruz Hidayətzadə bildirib ki, bu il sərgidə 14 ölkədən 118 müəssisəsə iştirak edəcək. Bütün təhsil sahəsinin mərhələlərini əhatə edəcək sərgidə Azərbaycan universitetləri aktiv iştirak edəcək: “Bu il sərgidə Almaniya, Latviya, Litva, Polşa, Macarıstan və digər ölkələrin ali təhsil müəssisələri, kollec və digər təhsil qurumlarının nümayəndələri sərgi ziyarətçilərini təhsil proqramları ilə tanış edəcəklər”.
Qeyd edək ki, 10-cu (yubiley) Beynəlxalq Təhsil Sərgisi 7-9 oktyabr tarixlərində "Baku Expo" Mərkəzində davam edəcək.
Ağa AKİFOĞLU
