Millət vəkili Qənirə Paşayeva İzmir Böyükşəhər Bələdiyyə başkanı Aziz Kocaoğlu ilə görüşüb. Modern.az-ın məlumatına görə, görüşdə deputat bildirib ki, Bakı ilə qardaşlaşmış şəhər olan İzmirdə Azərbaycan , Bakı parkının salınması və Azərbaycan mədəniyyətini tanıdan mərkəzin qurulması qardaş şəhərlər və ölkələr arasında münasibətlərdə müsbət bir addım olardı. Azərbaycan ilə Türkiyənin bir millət iki dövlət olduğunu qeyd edən millət vəkili Azərbaycanın daim qardaş Türkiyənin yanında olduğunu deyib. “Türkiyə nə qədər güclənərsə, Azərbaycan o qədər güclənmiş deməkdir. Azərbaycan nə qədər güclənərsə, bu, Türkiyənin gücü deməkdir", - deyən millət vəkili Azərbaycan ilə Türkiyə arasında əlaqələrin daha da inkişaf etdiyindən məmnunluğunu ifadə edib və bu əlaqələrin getdikdə daha güclənəcəyinə inandığını deyib.
Azərbaycanın tarixi, mədəniyyəti, Azərbaycan həqiqətləri ilə bağlı geniş məlumatlar verən millət vəkili Qənirə Paşayeva görüşdə həmçinin Ermənistanın torpaqlarımızın 20%-ni işğal altında saxlaması, qaçqın və məcburi köçkünlərin uzun illərdir öz doğma yurdlarına dönə bilməməsi, Dağlıq Qarabağ və işğal edilmiş digər Azərbaycan ərazilərində dinc azərbaycanlılara qarşı ermənilər tərəfindən törədilən soyqırımlar, qətliamlar, tarixi abidələrin erməni vandalizminə məruz qalması barədə də danışıb. Xocalı Soyqırımının 21-ci ildönümü ilə bağlı təşkil edilən konfransda iştirak etmək üçün İzmir şəhərinə səfər etdiyini bildirən millət vəkili Qənirə Paşayeva ermənilərin 21 il əvvəl Xocalıda dinc azərbaycanlılara qarşı soyqırım törəkdiklərini və insanlığa qarşı bir cinayət olan Xocalı Soyqırımını unutmayacağıq və unutdurmayacağıq , - deyib.
Millət vəkili Qənirə Paşayeva İzmirin EXPO 2020-yə namizədliyinin bütün Türk dövlətləri tərəfindən dəstəklənməsinin vacibliyini və bunun ortaq mədəniyyətimizin, ortaq tariximizin öyrənilməsi baxımından əhəmiyyətli olduğunu dedi. Millət vəkili Qənirə Paşayeva İzmir Böyükşəhər Bələdiyyə başkanı Aziz Kocaoğlunu Azərbaycana səfər etməyə dəvət edib.
İzmir Böyükşəhər Bələdiyyə başkanı Aziz Kocaoğlu dəvəti qəbul edərək böyük məmnuniyyətlə Azərbaycana səfər edəcəyini bildirib. Aziz Kocaoğlu yaxın zamanlarda İzmir şəhərində Azərbaycan parkının salınması istiqamətində işlərin aparılacağını deyib. İzmir Böyükşəhər Bələdiyyə başkanı Azərbaycan və Türkiyənin bir millət, iki dövlət olduğunu və qardaşlıq bağlarının çox güclü olduğunu vurğulayaraq, iki ölkə arasında iş birliyinin daha da genişləndirilməsinin önəmli olduğunu söylədi. İzmir Böyükşəhər Bələdiyyə başkanı Aziz Kocaoğlu Azərbaycan dövlətinin İzmirdə, Aliağada təkcə İzmirin deyil Türkiyənin inkişafına yönələn sərmayələr qoymasına xüsusi diqqət çəkərək iki qardaş ölkə və şəhər arasında əlaqələrin daha da genişlənməsindən məmuniyyət duyduğunu deyib və bu əməkdaşlığın daha da genişlənməsi üçün səyləri daha da artıracaqlarını deyib.
Görüşdə DAK başqan yardımçısı Asif Qurban, Zəka İnkişaf Mərkəzinin rəhbəri Nərgiz Paşayeva ,Azərbaycan Kültür və Dayanışma Dərnəyi rəhbəri Turgut Aran, Azərbaycan Öyrəncilər Təmsilçisi Cavid Əliyev, Zəka İnkişaf Mərkəzinin rəhbəri Nərgiz Paşayeva,TİMUR başqanı Çingiz Bayramov da iştirak ediblər.
Görüşün sonunda millət vəkili Qənirə Paşayeva İzmir Böyükşəhər Bələdiyyə başkanı Aziz Kocaoğluna Azərbaycan həqiqətlərinə, tarixinə, mədəniyyətinə dair kitablar və materiallar təqdim edib.
Modern.az
