Սրտանոթային հիվանդությունների ռիսկը նվազեցնելու համար ամեն օր 10 հազար քայլ անելը պարտադիր չէ:
Modern.az-ը հայտնում է, որ սա պարզել են գիտնականները, ովքեր ուսումնասիրել են Մեծ Բրիտանիայում բարձր արյան ճնշում ունեցող ավելի քան 36 հազար մարդու տվյալները։ Հետազոտության արդյունքները հրապարակվել են «European Journal of Preventive Cardiology» ամսագրում։
Հետազոտության մասնակիցները կրել են ֆիզիկական ակտիվությունը չափող սարքեր, և նրանց առողջական վիճակը վերահսկվել է մոտ 10 տարի։ Արդյունքները ցույց են տվել, որ ամենօրյա ֆիզիկական ակտիվության բարձրացումը կապված է սրտանոթային լուրջ խնդիրների ռիսկի նվազման հետ։
Մասնակիցների շրջանում ֆիզիկական ակտիվության ամենացածր ցուցանիշը օրական միջինը 2344 քայլ է եղել։ Յուրաքանչյուր լրացուցիչ 1000 քայլ կապված է սրտանոթային լուրջ իրադարձությունների ռիսկի մոտ 17 տոկոսով նվազման հետ։
Միաժամանակ, ինսուլտի ռիսկը 25 տոկոսով ցածր է եղել, սրտի անբավարարության ռիսկը՝ 22 տոկոսով, իսկ ինֆարկտի ռիսկը՝ 9 տոկոսով։
Գիտնականները պարզել են, որ լրացուցիչ քայլերի օգուտը կախված չէ մարդու նախկին ֆիզիկական ակտիվության մակարդակից։ Այսինքն, օրական մոտ 3000 քայլ անող մարդու համար օգտակար է եղել լրացուցիչ 1000 քայլ անելը, ինչպես նաև արդեն 7000 և ավելի քայլ անող մարդու ակտիվության բարձրացումը։
Այնուամենայնիվ, մոտ 10 հազար քայլից հետո լրացուցիչ քայլերի զգալի առավելությունը սրտանոթային առողջության տեսանկյունից զգալիորեն չի աճել։
Այսպիսով, ուսումնասիրությունը ցույց է տալիս, որ ամեն օր պարտադիր 10 հազար քայլ անելու նպատակը անհրաժեշտ չէ։ Նույնիսկ ամենօրյա ֆիզիկական ակտիվության համեմատաբար փոքր աճը, հատկապես բարձր արյան ճնշում ունեցող մարդկանց մոտ, կարող է կապված լինել սրտանոթային առողջության հետ կապված դրական արդյունքների հետ։
Նշենք, որ ուսումնասիրությունը քայլերի քանակի և հիվանդության ռիսկի միջև վիճակագրական կապ է հաստատել։ Այս արդյունքները չեն ապացուցում, որ քայլերի ավելացումը ուղղակիորեն կանխում է սրտանոթային իրադարձությունները։
