Bu gündən etibarən “Azəriqaz” İstehsalat Birliyi (İB) Sabunçu texniki istismar xidməti gücləndirilmiş rejimdə fəaliyyət göstərir.
“Azəriqaz” İB-dən Modern.az-a verilən məlumata görə, kütləvi sayğac dəyişikliyindən sonra yeni smart kartların verilməsi, bloklanmış kartların və yaxud abonent tərəfindən səhvən söndürülmüş sayğacların (OFF rejimi) yenidən aktiv olunmasına dair müraciətlər xeyli artıb:
“Ona görə də Bakıxanov qəsəbəsi, Nazim İsmayılov küçəsi 104 ünvanında Sabunçu texniki istismar xidmətində yeni fəaliyyət istiqaməti seçilib və gücləndirilmiş iş rejimi tətbiq olunub”.
Rəsmi məlumatda o da qeyd edilib ki, müraciətlərin artımını nəzərə alaraq 4 və 5 saylı “ASAN xidmət” mərkəzlərində abonentlərə xidmət göstərən Birliyin mütəxəssisləri Sabunçu xidmət sahəsinə cəlb olunublar:
“Onlar 3 saylı “ASAN Kommunal” mərkəzi istifadəyə verilənədək bu gündən etibarən Sabunçu xidmət sahəsində işə başlamaqla yuxarıda qeyd edilən çoxsaylı müraciətlərə dair əməliyyatları icra edəcəklər”.
