Ötən gecə İspaniya La Liqasının səkkizinci turunda “Barselona”-“Sevilya” matçı baş tutub.
Modern.az xəbər verir ki, “Kamp Nou”da keçirilən qarşılaşma katalonların böyük hesablı qələbəsi ilə yekunlaşıb.
Matçın 27-ci dəqiqəsində uruqvaylı forvard Luis Suarezin möhtəşəm qolu ilə “Barsa” irəli keçib. Cəmi 5 dəqiqə sonra Arturun ötürməsini Arturo Vidal qola çevirib. 3 dəqiqə sonra Arturun növbəti ötürməsini bu dəfə Ousman Dembele qolla tamamlayıb.
Oyunun ikinci hissəsində “Barselona”nın kapitanı Lionel Messi cərimə zərbəsini dəqiq yerinə yetirərək komandasının 4-cü qolunu qapıdan keçirib. Bu, Messinin mövsümdə vurduğu ilk qol olub.
Argentinalı ulduz bununla da La Liqada 21-ci əsrdə 16 mövsümdür ard-arda qol vuran tək futbolçu adına da yiyələnib. Bu qol həmçinin Messinin bütün turnirlərdə “Barsa” ilə cərimə meydançasının kənarından vurduğu 100-cü (43-ü cərimə zərbəsindən) qol kimi futbol tarixinə düşdü.
Qeyd edək ki, “Sevilya” üzərində 4-0 hesabı ilə qələbə ilə “Barselona” turnir cədvəlində 16 xalla ikinci yerdə qərarlaşıb. La Liqaya 18 xalla “Real Madird” başçılıq edir.
T.İSMAYIL
