Azərbaycan Qida Təhlükəsizliyi Agentliyinin 100-ə yaxın əməkdaşı işdən çıxarılıb.
Modern.az-ın məlumatına görə bunu agentliyin sədri Qoşqar Təhməzli jurnalistlərə açıqlamasında bildirib.
Onun sözlərinə görə, AQTA-da fəaliyyətə başladığı gündən bu vaxta qədər 100-ə yaxın əməkdaş işinin öhdəsindən gəlmədiyinə görə vəzifəsindən azad olunub:
"Neqativ hallarla bağlı agentlik Baş prokurorluğa müraciət edib və üç əməkdaşımız qeyri-qanuni əməllərdə iştirak etdiyi və əməllərində cinayət tərkibi olduğu aşkarlanıb. Hazırda onlar öz cəzalarını çəkirlər".
O qeyd edib ki, qida təhlükəsizliyi sahəsində Prezidentin başlatdığı islahatlara kim kölgə salmağa çalışacaqsa, layiqli cəzasını alacaq:
“Biz o adamlara qarşı qanunda nəzərdə tutulmuş ən sərt tədbirləri görəcəyik".
