Niderland Krallığının Amsterdam şəhərində yaşayan həmyerlimiz Səltənət Rəvanqızının təşəbbüsü ilə Azərbaycanın Milli Qəhrəmanı Albert Aqarunovun xatirəsinə həsr olunmuş beynəlxalq poçt markası buraxılıb.
Diasporla İş üzrə Dövlət Komitəsindən Modern.az-a verilən məlumata görə, “Azərbaycanın inciləri” layihəsi çərçivəsində gerçəkləşdirilən markanın üzərində I Qarabağ müharibəsi zamanı Şuşanın müdafiəsi uğrunda həlak olan etnik yəhudi Albert Aqarunovun şəkli təsvir edilib. Markalar Niderlandın rəsmi poçt rabitəsinin PostNL milli operatoru tərəfindən çap edilib.
Qeyd edək ki, bundan öncə sözügedən layihə çərçivəsində dahi siyasətçi və görkəmli dövlət xadimi Heydər Əliyevin anadan olmasının 98-ci ildönümünə, “Xarı bülbül” çiçəyinə, Xalq rəssamı Sakit Məmmədovun əsərlərinə həsr olunmuş poçt markaları buraxılıb.
